Cada 2 d’ochobre, día de la non violencia, na ONU fáense actividaes culturales que promueven la cultura de paz y la tolerancia. Podíemos camentar que les tases de la violencia xeneralizada de los homes escontra les muyeres van amenorgando colos años pero por desgracia medren y les que más la sufren son les muyeres d’entre 15 a 24 años. Son munches les voces que, como la de Tedros Adhanom Ghebreyesus, director xeneral de la OMS, alerten de que «la violencia escontra la muyer ye endémica en tolos países y cultures» y que namás se-y va poner frenu si los gobiernos, las comunidaes y les persones adopten midíes y les integren dafechu col envís de «camudar actitúes perxudiciales, meyorar l’accesu a les oportunidaes y los servicios pa les muyeres y les neñes y fomentar les rellaciones saludables y de respetu mutuu». De toles maneres, dalgunos dirixentes de dellos países nin atienden nin entienden la necesidá d’acabar con esta situación, polo que nun faen nin gotu casu a estos encamienten. Ún d’esos países ye Afganistán. Ello ye que, tres la retirada del exércitu americanu y la toma d’Afganistán polos talibanes, prodúxose entre otros ún de los tipos de violencia más corrientes: la violencia de xéneru. Ye verdá que, en primeres, entá hubo dalgo d’esperanza poles palabres apaciguadores que llanzaron dalgunos de los sos dirixentes, que paecíen que deprendieren de los erros del pasáu, pero llamentablemente la esperanza foi diliéndose cuando’l gobiernu que formaron, namás d’homes, entamó a regular delles midíes como la de zarrar el Ministeriu d’Asuntos de la Muyer n’Afganistán pa sustituyilu pol de Promoción y Fomentu de la Virtú y la Prevención del Viciu, que yá funcionare nos años 90 y nel que facíen una estricta interpretación de la llei islámica. Ente los sos llabores, atacar a les muyeres que caminaren pela cai ensin la protección d’un home, lo mesmo qu’a aquelles que nun vistieren d’alcuerdu colos cánones talibanes. Asina pues, la reacción nun se fizo esperar: Nestos díes hai una campaña al traviés de les redes sociales pa protestar contra’l nuevu códigu de vistimenta de los talibanes. Compártense semeyes de muyeres con ropa tradicional afgano colorío y hai hashtags como #DoNotTouchMyClothes y #AfghanistanCulture.
El casu ye qu’hai mieu de que los talibanes vuelvan a les prohibiciones qu’hebo ente 1996 y 2001, que fueren 28, siendo les más significatives ente les referíes a la manera de vistir el nun permitir ropa de colores vistosos, porque los talibanes dicen que son «colores sexualmente atractivos»; impidir a los xastres tanto tomar midíes a les muyeres como coser ropa femenino; nun llevar zapatos de tacón (un home nun pue oyer los pasos d'una muyer) y emplegar pantalones acampanaos, anque tean tapaos sol burka. Amás, les muyeres nun puen enseñar nenguna parte del so cuerpu en públicu, polo que taben obligaes a llevar el burka, el velu llargu que-yos tapa’l rostru. Delles muyeres llevaron palices y güelpes por llevar los furacos del burka demasiao grandes anque, comparao cola llapidación pública de les muyeres acusaes de tener rellaciones fuera del matrimoniu, esto igual ye pecata minuta. Lo qu’agora esmuel, y muncho, foi l’anunciu fechu pol Gobiernu talibán de la vuelta a les execuciones y otros castigos físicos, como les amputaciones. Cuando sentimos al ministru de Prisiones, NooruddinTurabi, dicir que «cortar manes ye bien necesario pa la seguridá» decatámonos d’hasta ónde van ser capaces de llegar. Nes sos mentes «perclares» y «xusticieres» namás esiste una dulda: si les execuciones deben ser un espectáculu públicu o quedar finxáu nel de les prisiones. De toles formes, nun sé por qué espatuxamos cuando a lo llargo del pasáu réxime talibán les afganes vivieron tres veces peor que les mascotes nel Occidente. Yá nun duldamos de que la relativa llibertá na manera de vistir paez que va durar poco. Ye verdá que nes grandes ciudaes nun obligen a les muyeres a tapase col burka, pero les ventes de burka duplicáronse y aumentaron muncho de preciu.
Toles muyeres viven en peligru n’Afganistan, pero aquelles qu’ocuparon altos cargos na administración como ministres, alcaldeses, xueces y oficiales de policía, entovía más. La comunidá internacional diz que ta mui esmolecida colos derechos de les muyeres y el voceru talibán Zabihula Mujahid asegura que van tener derechos y deberes, pero conforme a la ambigua sharía. Tamién diz que’l pueblu afganu nun ye nenguna esceición: gústa-y caltener los sos principios y valores. El sistema educativu ye responsable en parte de la so tresmisión, pero esti tema merez atención aparte. Dende llueu, los talibanes camudaron poco na so manera de vistir y siguen ensin afeitase les sos llargues barbes, pero lo malo ye qu’otra vuelta demuestren que puñen como mules contra tolo que nun-yos cabe nes sos dures molleres.