La editoral Radagast saca a la venta la primera traducción con nueve hestories de H.P. Lovecraft
19 oct 2023 . Actualizado a las 21:30 h.La editorial asturiana Ediciones Radagast acaba de sacar a la venta la que ye la primer traducción de la hestoria de la obra de Lovecraft a la llingua asturiana. Trátase de «La Llamada de Cthulhu y otres hestories» que recueye 9 de los rellatos más conocíos del famosu maestru del horror cósmicu H.P. Lovecraft. Pente ellos destaquen los conocíos La Llamada de Cthulhu, El Color de fuera l’espaciu o la Historia del Necronomicón.
«La llamada de Cthulhu y otres hestories» trai a la vida’l mundu d’horror cósmicu y lo sobrenatural que carauteriza la obra de H.P. Lovecraft. Al traviés de les pallabres de Carbayales, los llectores asturianos van poder somorguiase na obra d’ún de los escritores más influyentes nel xéneru del horror.
Lovecraft, conocíu pol so estilu distintivu y les sos narratives enigmátiques, cobra nueva vida nesta edición n’asturianu. Los fans de la lliteratura de terror van tener la oportunidá d’esplorar los rellatos más inquietantes de Lovecraft nuna llingua na qu’entá nun s’escribieren pallabres como «cthulhu r'lyeh wgah'nagl».
El traductor, Adrián Carbayales, trabayó a conciencia pa caltener la esencia y el misteriu de les hestories orixinales al empar que les adautó a la riqueza léxica y llingüística del asturianu. La so xera dio nuna traducción que recrea fielmente l’atmósfera única de los rellatos de Lovecraft. Carbayales, que ye tamién l’autor de la polémica novela La Rexenta contra Drácula, publicada tamién por Radagast en 2022, ye almirador de Lovecraft y considera «que yera una falta tremenda que nun tuviéremos n'asturianu a ún de los autores más importantes del sieglu XX» y ún de los pioneros de lo que se vieno en llamar la lliteratura pulp.
«La llamada de Cthulhu y otres hestories» ye un llogru significativu pa la cultura asturiana. Na nota de prensa, la editorial Radagast diz tar arguyosa de presentar esta obra que va abrir nueves puertes al mundu del horror n’asturianu y que nun cuenta con nengún tipu de sovención o ayuda pública. La novela va tar nel mercáu a partir de la selmana que vien, finales de ochobre.