Cuatro Gotes prepara un documental sobre Conceyu Bable nel 50 aniversariu de la so fundación
AGORA
Esta obra cinematográfica documental dirixida por Inaciu Galán va tocar l'orixe, desenvolvimientu y hestoria de la organización fundada en 1974
31 ene 2024 . Actualizado a las 13:03 h.La productora Cuatro Gotes ta acabante de dar l’anuncia del documental nel que lleva dellos meses trabayando de cara a esti 2024, nel que fai 50 años de la fundación de la organización Conceyu Bable. Esta obra cinematográfica documental dirixida por Inaciu Galán va tocar l’orixe, desenvolvimientu y hestoria de la organización fundada en 1974 col envís de caltener y esparder la llingua asturiana y d'algamar l'autonomía política d'Asturies, cambiando dafechu la percepción de la identidá asturiana, con aportaciones tan importantes como la recuperación de la bandera d'Asturies.
Con esta producción pretende facese un homenaxe al llabor que llevaron a cabu los homes y muyeres integrantes d’esta asociación que lluchó pola dignificación y recuperación del asturianu nos tiempos de la Transición. La so grabación y estrena nel añu 2024 nun ye casualidá. Ye precisamente esti añu cuando, Conceyu Bable, llega al so 50 aniversariu dende la fundación nuna entrevista na revista Asturias Semanal, un 16 de payares de 1974.
El documental va cuntar coles intervenciones de los protagonistes, con nomes tan relevantes como Xuan Xosé Sánchez Vicente, Xosé Lluis García Arias, Amelia Valcárcel o Carlos Rubiera, mesmo qu’historiadores que pongan en contestu l’apaición d’esta asociación en defensa del asturianu y la identidá d'Asturies.
Con esta anuncia faise un llamáu tamién a la xente que caltenga material d’archivu, hestories d'interés y otrs cuestiones que puedan completar al llabor d'investigación yá fechu na productora. Al mesmu tiempu, Cuatro Gotes Producciones busca la collaboración de les instituciones pa llograr un trabayu qu’afonde de manera clara na hestoria de la organización p’algamar un rellatu que correspuenda y faiga xusticia a les reivindicaciones de Conceyu Bable.
Con esti llabor Cuatro Gotes Producciones sigue'l camín de documentar la hestoria d'Asturies y la llingua asturiana, sumando esti documental a proyectos como los documentales No se dice ye, se dice es, Elles, muyeres na lliteratura asturiana o'l programa de radio documental «Asturies 81:21, la hora de l'autonomía».