La corporación anterior mostróse dispuesta a facer la solicitú, pero nun llegó a formulase
08 feb 2024 . Actualizado a las 13:44 h.La conceyala d'IX-Más País-IAS nel Conceyu de Xixón, Noelia Ordieres, va llevar al Plenu una iniciativa pa encamentar a la Xunta de Gobiernu local a principiar el procedimientu correspondiente col Ministeriu de Tresportes pa que la estación provisional de Sanz Crespo pase a llamase «Rosario d'Acuña», nome que se daría tamién a la futura estación intermodal.
La corporación anterior mostróse dispuesta a facer la solicitú, pero nun llegó a formulase, anque les firmes recoyíes nel so día a favor d'esta iniciativa. Asina lo esplicó Ordieres, en rueda de prensa nel Consistoriu, que pidió principiar esti trámite.
«Sobra esplicar los motivos pa que tenga esti reconocimientu», apuntó la conceyala sobre la llibrepensadora madrilana afincada en Xixón. Al empar, insistió en qu'esta ye una reivindicación que provién del texíu asociativo xixonés.
Coles mesmes, incidió en que la petición se fai teniendo en cuenta que, nel so día, la ministra de Tresportes, en 2022, anunciara'l plan pa facer un cambiu de nome a estaciones de ferrocarril, siendo ún de los primeros el de la estación madrilana Puerta de Atocha - Almudena Grandes, informa Europa Press.