La lliteratura n'asturianu va poder optar a les ayudes a la creación lliteraria y les vinientes a la edición
22 feb 2024 . Actualizado a las 14:36 h.El ministru de Cultura, Esnest Urtasun, afirmó esti xueves n'Avilés que «na mio opinión, como ministru de cultura, sería mui positivu qu'avanzáramos hacia la oficialidá». Amás, quixo dexar «claro» el so compromisu cola llingua asturiana, qu'a pesar de nun ser oficial si ta protexida pol Estatutu d'Autonomía.
Asina lo indicó'l ministru n'anunciando, na rueda de prensa posterior a la sectorial de cultura celebrada nel Centru Niemeyer y acompañáu pola conseyera de Cultura del Principáu, Vanessa Gutiérrez, que la lliteratura n'asturianu, a pesar nun ser una llingua oficial del Estáu, si diba poder optar a les ayudes a la creación lliteraria y a les ayudes vinientes a la edición, dalgo que nun pasaba hasta la fecha --anque col ministru Iceta sí que se permitió que l'asturianu pudiera optar a les ayudes a la traducción ente llingües del Estáu--.
Urtasun lo afirmó asina depués de qu'esti miércoles, en declaraciones a los medios en Mieres, defendiera la llingua asturiana y mostrara'l so apoyu dende'l Ministeriu, pero refugara en dos ocasiones la entruga sobre si esti idioma tendría que ser oficial.
Un día depués quixo dexar clara la so postura favorable y, yá a entrugues de los medios, indicó que «tomó nota» de los planteamientos que-y realizaron ayeri dende l'Academia de la Llingua Asturiana (ALLA) --Urtasun convirtióse nel primer ministru que visitó esta institución--.
Ente estos taba'l reconocimientu de la especialidá docente pal profesoráu d'asturianu o regular l'usu d'esta llingua nel Congresu. El ministru recordó qu'eses nun son competencies de la so cartera, pero mostró'l so compromisu col asturianu y quixo insistir en que «sería positivu que fuera oficial».
Otra de les reivindicaciones de l'ALLA ye que los escritores n'asturianu puedan optar a los Premios Nacionales de Lliteratura, como pasa colos autores en vascu, catalán o gallegu. Preguntáu por esto indicó que «tenemos que dir viendo», en referencia a los siguiente pasos a dar con una llingua que nun ye oficial, pero que sí ta protexida estatutariamente. «Puen dase munchos pasos, el compromisu políticu ye claro», sentenció sobre la cuestión llingüística.
Per otru llau, resaltó'l compromisu de la candidatura de la cultura sidrera como Patrimoniu Inmaterial de la UNESCO y l'apoyu al Arte Asturianu o Prerrománicu, «ún de los grandes patrimonios d'España. Asturies ye un pergrande motor cultural del nuestru país y el Ministeriu va siguir apostando por ello», afirmó.
P'acabar, la conseyera de Cultura, Política Llingüística y Turismu, Vanessa Gutiérrez, destacó la «sensibilidá con Asturies» del ministru desque tomó posesión del cargu y, especialmente, el so «compromisu cola cultura asturiana». Nesi sentíu, afirmó que l'Executivu autonómicu ta «en sintonía» cola fueya de ruta marcada por Urtasun na sectorial, basada, según indicó, na defensa de los derechos culturales de la ciudadanía, l'apoyu a los creadores y la llibertá de creación, amás de la defensa de los derechos llingüísticos, con especial mención al asturianu; informó Europa Press.