La Xunta Xeneral apoya la Declaración de Bimenes p'avanzar na oficialidá de les llingües d'Asturies

La Xunta Xeneral apoyó esti miércoles, colos 24 votos de PSOE, IX-Convocatoria y el Grupu Mistu, tanto de Foru como de Podemos, la Declaración de Bimenes del Conseyu de la Rede de Normalización Llingüística, en defensa de les llingües propies d'Asturies y p'avanzar hacia la so oficialidá. Los 17 diputaos del PP astuviéronse y los 4 de Vox votaron en contra.

La proposición non de llei (PNL) presentáronla de forma conxunta PSOE y IX, y los sos diputaos Noelia Macías y Xabel Vegas, respectivamente, defendieron la iniciativa y apellaron al PP a que se sumen al consensu en favor de la riqueza llingüística del Principáu.

Noelia Macias encamentó a dexar d'usar les llingües propies d'Asturies como elementu de discordia y algamar el consensu másimu pa respetar la pluralidá llingüística asturiana. «Miren pa Galicia y tomen d'exemplu a los sos compañeros gallegos, arguyosos de la so cultura y de defender el gallegu», pidió-y al PP.

Na mesma llinia, Xabel Vegas fixo un llamamientu a tolos partíos democráticos en defensa del patrimoniu llingüísticu de tolos asturianos y de toles asturianes. El diputáu d'IX, qu'optó por defender la iniciativa en castellanu pa evidenciar que l'asturianu nun pue cayer en ser «dalgo namás testimonial y autorreferencial», pidió al PP que se sienten a negociar «un modelu d'oficialidá col que puedan sentise cómodos».

«Tamos convencíos de que más ceo o más tarde, ustedes van acabar entendiendo la importancia de los idiomes p'Asturies», dixo Vegas, recordando que'l PSOE nun foi partidariu a lo llargo de décades. Tanto Foru como Podemos mostráronse partidarios de la iniciativa, mentes que dende'l PP, el diputáu José Luis Costillas argumentó que la so formación diz «sí al asturianu y non a la cooficialidá», recordando ser los únicos qu'aprobaron una llei d'usu y promoción. «Asina-y lo manifestó al propiu presidente del PP de l'Academia de la Llingua na visita que se realizó a la sede d'esa institución", dixo'l diputáu 'popular', señalando que la declaración de Bimenes ye "la burda respuesta del PSOE y el so sociu» a la visita.

Per otru llau, el diputáu de Vox Javier Jové apuntó que los asturianos yá decidieron cuál ye'l llugar que tien qu'ocupar l'asturianu, afirmando qu'esi ye'l «bagul de les alcordances», incidiendo en que l'asturianu «nun ye oficial, pero tampoco nun ye illegal». «Nun persiguen a naide nin lu multen por utilizar en llingua. Tolo contrario, ye subvencionáu. Dexen de lloramicar. Ustedes nun son víctimes, son verdugos», dixo.

Coles mesmes, comentó qu'hai munchos años na so familia decidieron «falar n'inglés». «Facémoslo en tolos sitios. Non namás nel ámbitu domésticu, sinón tamién cuando tamos na cai, cuando vamos a la compra, cuando tamos nel parque. ¿Pero saben lo que nun facemos? Yo cuando voi cola mio fía al Alimerka a facer la compra, y tamos falando tranquilamente n'inglés ente nós, pero cuando voi a la caxera a que me cobre, nun-y esixo que me fale n'inglés», rellató.

Amás, aprovechó p'alvertir al presidente y portavoz del PP, Álvaro Queipo de que si se pasa «al otru bandu» nun va ser presidente del Principáu porque nun va cuntar col so apoyu, informa Europa Press.

---

---