Cultura destina 175.000 euros a actuaciones municipales de caltenimientu de BIH y albergues de pelegrinos
AGORA
Les ayudes tienen dos apartaos, el primeru pa la realización d'actuaciones sobre bienes d'interés históricu y el segundu pa la meyora d'albergues del Camín de Santiago
12 mar 2024 . Actualizado a las 18:47 h.La Conseyería de Cultura, Política Llingüística y Deporte destinó 175.000 euros a subvencionar actuaciones d'entidaes locales pal caltenimientu y la recuperación del patrimoniu históricu. El Boletín Oficial del Principáu (BOPA) publica la convocatoria d'estes dos llinies, que van poder solicitase hasta'l 27 de marzu.
Según esplicó'l Principáu en nota de prensa, les ayudes tienen dos apartaos. El primeru ta dotáu con 150.000 euros pa la realización d'actuaciones sobre bienes d'interés históricu, de propiedá individual o compartida de la entidá local solicitante. El segundu, con un presupuestu de 25.000 euros, ye pa la meyora d'albergues de pelegrinos del Camín de Santiago de titularidá o xestión municipal.
Ente los criterios de valoración pa los bienes d'interés cultural va tenese en cuenta'l valor históricu del patrimoniu, la so singularidá y el riesgu de desapaición o la vinculación con núcleos y víes d'interés. Sobre les subvenciones pa los albergues nes rutes xacobees, Cultura va financiar, ente otros, trabayos d'arreglu o meyora del equipamientu y va tener en cuenta la llegada anual de visitantes.
La cuantía máxima subvencionable va depender del númberu d'habitantes de cada entidá local y va cubrir dende'l 50% hasta'l 90% del presupuestu presentáu na solicitú, informa Europa Press.