La primer xunta d'esti grupu de trabayu nel que van participar los clubes representativos del deporte femenín asturianu, tanto d'equipu como de deporte individual, deportistes, entrenadores, xueces y árbitres, va ser el 19 de marzu
12 mar 2024 . Actualizado a las 13:42 h.La Conseyería de Cultura, Política Llingüística y Deporte del Gobiernu asturianu anunció la creación de la «Mesa del Deporte practicáu por Muyeres» pa fomentar la igualdá nesti tipu d'actividaes.
Asina lo anunció la conseyera Vanessa Gutiérrez na so visita a les xornaes Muyer y Deporte, que se celebraron nel recintu deportivu de Llamorgal pa muyeres mayores de 35 años.
La primer xunta d'esti grupu de trabayu nel que van participar los clubes representativos del deporte femenín asturianu, tanto d'equipu como de deporte individual, deportistes, entrenadores, xueces y árbitres, va ser el 19 de marzu, y va tratar los pasos a siguir por un órganu «qu'aspira a ser una ferramienta efectiva pa ellaborar un plan d'acción con midíes que apoyen y fomenten el deporte femenín. Va analizar dende les árees onde podemos ameyorar a les necesidaes que tengan los clubes y les muyeres deportistes, pasando poles actuaciones que podemos implementar dende esti equipu de trabayu», esplicó.
Gutiérrez destacó que'l «trabayu conxuntu colos clubes y les mesmes deportistes ye fundamental p'avanzar n'igualdá». Amás, asitió esti oxetivu como una política tresversal de la so conseyería y del Gobiernu del Principáu.
La creación d'esta mesa sumase al paquete de midíes impulsaes pol Gobiernu d'Asturies pa consiguir una igualdá real y efectiva ente homes y muyeres, especialmente nel deporte, un ámbitu nel que «precisamos siguir esplegando polítiques feministes que frenen les desigualdaes que, por desgracia, vemos que se siguen dando nel mundu deportivu», aseguró la conseyera.
Vanessa Gutiérrez punxo como exemplu de midíes necesaries la xornada entamada güei en Llamorgal, a la que foi cola directora xeneral d'Actividá Física y Deporte, Manuela Fernández, de la qu'esfrutaron deportistes mayores de 35 años y que tien como oxetivu fomentar un estilu de vida saludable y contribuyir a eleminar les barreres adicionales a les que s'enfrenten munches muyeres cola edá. L'actividá axuntó a numberoses participantes de deportes como'l rugby, pádel, tiru con arcu, bolos y clases d'exerciciu físicu impartíes pola expiragüista olímpica Luisa Álvarez.