El rector inaugura esti vienres la IV edición del seminariu sobre la oficialidá d'Iniciativa pol Asturianu
AGORA
Nesta ocasión, lleva'l títulu de «Entrín y non. Normalizar enantes de la oficialidá»
13 mar 2024 . Actualizado a las 14:04 h.El rector de la Universidá d'Uviéu, Ignacio Villaverde, va participar esti vienres 15 de marzu a les 16.30 hores nel Edificiu Históricu na inauguración de la IV edición del seminariu «Oficialidá: el camín constitucional pal futuru del asturianu», qu'entama Iniciativa pol Asturianu.
Nesta ocasión, el seminariu lleva'l títulu de «Entrín y non. Normalizar enantes de la oficialidá» y va celebrase esti vienres y esti sábadu con conferencies, meses de diálogu y la estrena d'un documental sobre l'usu de les tecnoloxíes nueves y la intelixencia artificial a la llingua asturiana.
Amás, nes xornaes van participar espertos en normalización llingüística d'otros territorios del Estáu, pa esplicar les polítiques de normalización llingüística que s'apliquen nos sos territorios. Amás, van tratase los retos y les propuestes d'una reforma de la Llei d'Usu y Promoción del Asturianu.
Tamién van participar representantes de diferentes asociaciones de reivindicación llingüística d'España y va lleese la 'Declaración d'Uviéu', que quier convertise nun manifiestu en defensa de la realidá plurillingüe d'España y que va aportar un decálogu de propuestes en defensa de los idiomes, informa Europa Press.