«Tienen la responsabilidá d'aplicala y nun lo faen», recuerda la XDLA a los firmantes de la Declaración de Bimenes
AGORA
El documentu recueye que «l'oxetivu de la política llingüística y de la normalización ye garantizar que toles llingües tengan les mesmes oportunidaes d'usu y desarrollu»
13 mar 2024 . Actualizado a las 14:00 h.La Xunta pola Defensa de la Llingua Asturiana (XDLA) recordó que los alcaldes firmantes de la Declaración de Bimenes, amás de los diputaos que l'apoyaron na Xunta Xenertal', «tienen la responsabilidá d'aplicar y desenvolver tolos puntos recoyíos y nun tán faciendo la parte que-yos correspuede».
Los conceyos presentes nel Conseyu de la Rede de Normalización Llingüística firmaron el 20 de febreru en Bimenes una declaración institucional en defensa de la oficialidá de les llingües propies d'Asturies. Posteriormente, el seis de marzu, la Xunta Xeneral apoyó colos 24 votos de PSOE, IX-Convocatoria y el Grupu Mistu, tanto de Foru como de Podemos, la Declaración. Los 17 diputaos del PP astuviéronse y los 4 de Vox votaron en contra.
El documentu recueye que «l'oxetivu de la política llingüística y de la normalización ye garantizar que toles llingües tengan les mesmes oportunidaes d'usu y desarrollu». Pa eso, aboga pola declaración d'oficialidá, pa cuntar «coles mesmes condiciones que'l restu de llingües oficiales d'España». La XDLA recuerda que «nengún pero se-y pue poner al testu en cuestión al tratar la convivencia natural ente les llingües d'Asturies, señalar la importancia d'acciones de normalización que garanticen oportunidaes y desenvolvimientu, concebir la diversidá como una oportunidá, llamar al diálogu y al consensu y afitar la necesidá de la declaración d'oficialidá».
Sicasí, espliquen que los alcaldes y el presidente Barbón que firmaron la declaración y los diputaos qu'apoyaron el testu na Xunta Xeneral «teniendo la responsabilidá d'aplicar y desenvolver tolos puntos de la declaración, nun tán faciendo la parte que-yos correspuende».
Asina, indiquen que les polítiques de normalización «nun existen nos más de los conceyos firmantes». Nesi sentíu, afirmen que munchos nin cumplen la llegalidá n'aspectos como l'usu de la toponimia oficial y nun tienen les webs municipales n'asturianu o en gallego-asturianu. Tamién recuerden que los diputaos na Xunta Xeneral soliciten la oficialidá «n'abstracto» cuando ye'l Parllamentu'l que ha impulsar una reforma estatutaria que la lleve alantre.
Por eso, la organización fai un «llamáu a la responsabilidá y la seriedá de la nuestra clas política» y piden pasar «de les declaraciones a los fechos» pa «impulsar el reconocimientu de los derechos y la igualdá xurídica que namás pue dar el marcu llegal de la oficialidá», informa Europa Press.