Claudia Elena Menéndez Fernández y Pablo Rodríguez Medina van ser los académicos de númberu nuevos de l'ALLA
AGORA
El plenariu tamién propón la entrada, como miembru d'honor, de la romanista Éva Buchi
10 abr 2024 . Actualizado a las 13:26 h.La xunta estraordinaria de l'Academia de la Llingua Asturiana (ALLA) propunxo, esti llunes día 8, la entrada de dos académicos nuevos como miembros de númberu, Claudia Elena Menéndez Fernández y Pablo Rodríguez Medina, y como miembru d'honor a Éva Buchi.
Los académicos van ser nomaos na sesión estraordinaria enmarcada nel XLV Día de les Lletres Asturianes, que va celebrase'l vienres 3 de mayu nel Teatru Campoamor d'Uviéu.
Claudia Elena Menéndez Fernández (La Güeria Carrocera, Samartín del Rei Aurelio, 1994) ye profesora de Llingüística Románica na Universidá d'Uviéu. Tien delles publicaciones y, en rellación cola ALLA, destaca la so implicación en dos comisiones de trabayu -pedagóxica y lexicográfica- y na Universidá Asturiana de Branu -como docente y directora-.
Per otru llau, Pablo Rodríguez Medina (L'Entregu, Samartín del Rei Aurelio, 1978) ye académicu correspondiente de l'ALLA y profesor de Llingua Castellana y Lliteratura en Secundaria y Bachilleratu. Como escritor ganó dellos de los concursos más importantes del país y como estudiosu ye autor d'una importante colección d'obres d'análisis lliterariu. Amás, tamién foi docente nos programes formativos de la institución.
P'acabar, Éva Buchi (Lucerna, 1964) ye directora d'investigación del Centre National de la Recherche Scientifique (CNRS), profesora de la Universidá de Lorraine, editora de la revista Zeitschrift für romanische Philologie y codirectora del Dictionnaire Étymologique Roman (DÉRom). Doctora en Llingua y Lliteratura Romániques, amás de ser miembru del comité científicu de Lletres Asturianes, delles de les sos investigaciones estudien l'asturianu.