Entamemos a xubir por si güei somos a algamar Uviéu. A lo primero, el camín ye emprunu según vamos averándonos a Penarréi, pernombrada nos vieyos testos del país.
Allúgase a manzorga de Las Xanas. Nun tiraremos preí a Pedroveya. Sedría guapo pero enguedeyao. De Las Xanas dizse que ye un escobiu. Si vos pruye, un beyu, esto ye, una garganta fonda. Siempre hebo ente nós gargantes fondes a les que, a vegaes, llamen desventíos, arribacheiros o derribadorios. Son de pergrán peligru si se desconocen les envueltes de la tierra. Una güeyada a Pedroveya sedría prestoso. Non, nun hai oveyes responsables del nome pero ésti paez que se debe a qu?ellí faen dixebra cuatro conceyos. El términu, petro en célticu, quería dicir ?cuatro?, quiciabes en referencia a Quirós, Santu Adrianu, Proaza y Morcín qu?ellí amuñonaron la so xuntanza.
Pero agora nós naguamos por coyer una senda más favoratible. La que nos empón a Tenebréu. Ellí, nel Altu los Novalinos, volvéi a mirar l?inmensu y non tan estrenchu país. Facéi que vos rellaten la hestoria de Munuza, escorríu, aforfugáu y desfechu polos ástures a lo cabero?l sieglu IX. Al llugar xustu entá lu llamen Valdolayés y non d?otra mena.. Non ?Olalíes?, nome ensin xacíu col que se trabucó un hestoriador al que nun retrucaron los otros y repitieron atestonando. ¡Valdolayés!, esto ye, el valle onde s?asitia Olayés, quiciabes una vieya casería a la vera?l camín que sigue al sur pel Cordal del Aramu. Acordáivos de Los Llodos... pues agora repítese lo mesmo, otra vuelta, la mesma hestoria del país que yá nun sabe onde tán los requexos que lu fexeron respetable y que, a lo fato, tapez mentantu afalaga y glaya glories nun se sabe bien de quién.
Empobinemos pel castañéu fúnebre y frescu. En xubiendo al picu podrá agüeyase perbién Siones cola so preciosa y bien empobinada vega. Siguíi alantre a la gueta la baxada a Caces. Vese a lo fondero?l valle. A la oriella, el Nalón xuega ente riaños dixebrando, respetuosu, Priorio de Les Caldes. Priorio foi praetorium onde s?allugó?l mandu romanu. En frente Les Caldes, les agües calientes qu?aselaben a los soldaos portadores de calígules apeguñaes de polvu y fedor. D?ellí miraben a Ovetum que vendría llueu d?apolazar Ciellagú, el castru yá ensin nome. Agora alviértese otra hestoria. Otros caminos. Nun sé si otru conceutu de la vida. En tou casu siguíi alantre. Que vos preste.