Llueu de roblar el pautu d’entrada d’España na Comunidá Europea, l’equipu de xente que collaboraba col negociador acoyía al ministru Fernando Morán nun digo que con grandes axagüeiros, pero sí amosando contentu a la par qu’entonaben l’Asturies Patria Querida como l’homenaxe más axeitáu a quien llograba lo que se sentía daquella como un triunfu. Nun sé si hai bibliografía crítica al usu nin qué pasaba entós pela conciencia, de xuru asturiana, de Fernando Morán pero, en tou casu, nun ha faltar quien vea nello la mayor de les xigomencies non buscada, acompangada de la música más emblemática del país. Sí deduciríen guapamente los más críticos, que too ello diba prestar poco a los pueblos verdes del Estáu a los que tamién representaba’l ministru Morán. N’efeutu, too podría paece-yos la mayor xirigoncia cuando comprobaren que los despoyaben de delles posibilidaes de futuru. Polo qu’Asturies se refier ellí quedaben frayaes y sapozaes pa siempre toles salíes al desarrollu de la minería, de la pesca, de la esplotación ganadera. A cambiu sí, entrábase nuna Europa democrática (llueu na OTAN) y na modernidá que predecíen pal sieglu XXI. Pero los datos económicos yeren los que yeren y, si daquién nun lo pescanciaba, bien llueu caería na cuenta de la fosca realidá. Les regles del xuegu yeren les que yeren y taben marcaes. Una llinia acababa de ser trazada y, darréu, tarazábense pela mano toles bravates qu’hasta entós se llanzaren a la vera del Pozu Barreo. Nada fuera de lo trazao yera yá posible. ¿Nada? Bono…, de mano siempre ye posible dalgo … si, pa ello, amás de querer se sabe facer.
Lo más nidio, en tou casu, ye que’l pasáu acababa d’acabase. Y con ello desaniciábase’l proteccionismu del franquismu serondu y el sacu ensin fondu de tantes hunoses conocíes (y tapecíes) nes fondures más insospechaes. Naide nun taba por creyelo (o naide nun taba no que celebraba) porque, si non, nun se negociaríen retiros xenerosos a cambiu de fíos, cuenques, pueblos, empreses yá ensin futuru. Los que naguaben con señaldá pol pasáu quixeron consolase diciendo que too yera mentira porque la mesma Comunidá Europea apurría espléndides ayudes que, darréu, sedríen sapozaes en glorietes, rondes, pontes, cases de museos mil y de cultures milenta, zarraes güei yá coles peslleres saltaes o’l cielurrasu esportielláu. Pero llueu dexaríen de llegar los encontos del dineru fácil y l’Alministración inxenua agravaríalo escaeciendo facer les instancies a la gueta de nueves peticiones a Bruxeles bien porque los secretarios nun sabíen les feches o, cenciellamente, nun teníen ganes d’escribir. Con ello, faciéndose pergrande una vieya realidá yá alvertida nos años setenta, pero muncho más agora axuntando a la crisis los problemes de la lleche y de la carne, la xente dexaba los pueblos contento con coyer les subvenciones algamaes por vender vaques o dexar cuota de lleche. Los llugares quedaben ermos y con ellos los praos, tierres, eríes y cortinales pa siempre yá terrén n’abertal namái bayuroso en rades, artos, escayos y garametes. Al empar tolos que quixeren trabayar deberíen buscar amu fuera. Toos. Pero lo más nuevo ye qu’al grupu axuntábense agora los más titulaos, los más preparaos, los más estudiaos. Yera llamentable pero entá los más faltosos ente nós pregonaron, al alto la lleva eso sí, lo fachendosa que se sentía la Universidá por preparar titulaos tan bien acoyíos (y non tan bien pagaos) nel estranxeru.
Asina, con esa cabeza, desiguóse l’Asturies rural porque, nun entendiendo un res, torgáron-y toa posibilidá evolutiva, como a bona parte de la industria y del saber facer de siempre. Baxó la natalidá, ensin torna pero persiempre col quexíu llastimeru de los ciegos, porque, con bon xuiciu, a naide-y presta facer fíos pa esi mundu que, fraternal sigún los utópicos dicen, entá sigue siendo anchu y ayenu, domináu por homes (tamién por muyeres) de pensamientu estrañu y alma bárbara.
Poro, nun hai exida. La llinia ta trazada. ¿Ye ello la cabera pallabra? Yelo namái si s’escaez qu’a les fates pallabres siempre se pue retrucar col puxu de los fechos y col enfotu de la razón, del trabayu y de la xuntanza y de la intelixencia. Sí, siempre hai un camín pa la pallabra y el pautu, si hai quien con xacíu respuenda d’ello. Y tien qu’habelu cuando persabemos qu’al Estáu entá dende equí nun se-y dixo a les clares que nun ye hora de federalismos asimétricos porque s’arrastra la dixebra más fonda de la desigualdá ente los pueblos por una política que sacrificó a dellos en beneficiu d’otros meyor trataos y siempre más esixentes. Poro, fai falta falar. Y que, quien fale, fale bien. Güei quédanos pocu pueblu porque abenayá que fuxó’l señor. Hai, eso sí, inhibición culpable de quien fai de señor o alienda namái esllandies y unidimensionales alternatives señoriales. Tornemos al pautu pol país. La política ye pal pautu. Al pautu vase a la gueta de la complicidá col vecín non coles baces perdíes del probe d’espíritu, el que se presenta a sí mesmu cola tosca y fata humildá del más foín de los homes o cola ruina sofitancia de la muyer ensin complexos.