El Economato de Turón dobla la so plantiya tres una reforma integral del establecimientu

El Economato de Turón reabre les sos puertes al públicu n'acometiendo la reforma integral y ampliación del establecimientu. El Arco invirtió más d'un millón d'euros en remocicar les instalaciones y la plantiya va pasar de 12 a 24 trabayadores. 

L'establecimientu que se pon en marcha dispon d'una sala de ventes estremada en dos pisos que sumen más de 1.500 metros cuadraos. Amás, hai que sumar la planta soterraña que s'acondicionó como parking. La reforma supunxo tamién una importante meyora de l'accesibilidá nel edificiu gracies a les ramples mecániques que s'instalaron pa facer posible que los veceros camuden d'un pisu a otru con total facilidá.  

No que fai a secciones y servicios, la tienda de Turón va disponer de toles secciones de productos frescos: frutería, carnicería, pescadería, charcutería y panadería. Estes secciones, amás de la zona de llibre serviciu d'alimentos envasados, conxeláu o bodega, van allugase na planta baxa d'El Economato. Les secciones de perfumería, droguería, testil, calzáu, llibrería o la sección agrícola van asitiase na primer planta.  

Dende la empresa tamién destaquen qu'El Economato de Turón ye una tienda enexéticamente eficiente. Asina, diseñóse con sistemes de llume que van permitir amenorgar el consumu eléctricu, la climatización va xenerar una menor buelga de carbonu y les neveres y cámares frigorífiques van ser llibres d'emisiones de CO2. Amás, encargóse un estudiu pa la instalación de paneles fotovoltaicos nun futuru próximu.  

Xeneración d'empléu 

Amás, la reforma y ampliación d'El Economato de Turón xenera empléu. El modelu de tienda nuevu, cola implantación de les secciones de productos frescos, fai posible una medría de la plantiya de 12 a 24 trabayadores y qu'habitantes del valle que son emplegaos d'El Arco puedan treslladase y exercer el so oficiu na zona na que viven. La cadena de distribución d'alimentos apuesta por amenorgar na midida de lo posible los desplazamientos de los sos trabayadores y asina facilitar la conciliación llaboral y familiar.

Jesús Rodríguez Ponce, Conseyeru Delegáu del Grupo El Arco, asegura que «la reforma d'El Economato de Turón ye una ambiciosa actuación na que nun escatimaremos nin recursos nin esfuerzu pa poner a disposición de los vecinos del valle un establecimientu al altor de la respuesta y acoyida qu'ellos siempres dieron a la empresa».