AmazonSiero: ensin fecha de apertura

La economía taraminga y el trabayu produz anguaño un desasosiegu grande n’Asturies. El costu de la lluz, del carburante, la guerra d’Ucraína... El panorama nun paez mui gayoleru nesta seronda de 2022. Pa enriba, les últimes nueves sobre Amazon inducen al pesimismu: un frenu en seco pa los proyectos que tenía n’España, entre los que s’atopa’l de Bobes.

La fecha d’apertura en Siero esperábase pa dientro d’unes selmanes, pal final de payares, contra’l Black Friday. Lloñe queden yá los titulares qu’anunciaben que la multinacional diba crear más de 2.000 puestos na zona. El númberu fuera disminuyendo a poco y a poco y, nel momentu presente, les perspectives de toes aquelles persones que se formaron y volcaron les espectatives nesti centru loxísticu queda nel aire.

Amazon ye un exemplu claru de lo que supón la economía capitalista: instálase nun territoriu con toles facilidaes, cola promesa de la creación de puestos de trabayu, de futuru; y en cuenta d’ello ufierten unes condiciones llaborales pésimes y, si vienen tiempos difíles, reestructuren la empresa. Ye la barra llibre de la economía de mercáu.

Depués de vender la felicidá cola llegada del xigante loxísticu, agora llega la murnia realidá: camín de ser un páramu llaboral. En materia de creación d’empléu, Siero xugó toles cartes a Amazon, con un resultáu qu’hasta’l momentu produz plasmu. Cuantayá que l’ayuntamientu inora les demandes de CCOO d’ellaborar planes d’empléu locales pa persones ensin formación, fiando too a una multinacional.

L’Ayuntamientu tien qu’emburriar, débe-ylo a la población. Amazon nun cumplió los plazos; esperamos que reconduza’l so planteamientu y abra pronto’l centru de Bobes. Cuerre priesa p’Asturies. Los puestos de trabayu son pernecesarios, pero empléu, eso sí, con garantía y derechos, cumpliendo la normativa. Dende CCOO taremos sollertes pa que seya asina.

*Bibiana Martínez, Secretaria Xeneral CCOO Siero-Piloña