El quesu Casín DOP celebra la 35ª edición del certame'l 30 d'agostu n'El Campu

El quesu Casín vuelve a celebrar el so certame n'El Campu nuna edición que va ser yá la númberu 35. Una de les grandes novedaes del certame d'esti añu ye que nun va haber concursu pa escoyer el meyor quesu Casín del añu 2025. El motivu ye que la Denominación d'Orixe Protexida Quesu Casín traviesa un momentu clave na so hestoria más recién al cuntar con namás dos queseríes n'activu: quesería Red nel conceyu de Casu y quesería Ca Llechi nel conceyu de Piloña. La 35 edición d'esti certame cobra más importancia que nunca y l'oxetivu d'esti añu ye poner en valor y protexer, entá más, esti históricu quesu.

Por eso, el programa d'actividaes desenvueltu pol conceyu de Casu y el Conseyu Regulador del Quesu Casín, organizadores del eventu, va centrase en facer llegar al públicu'l valor y la dimensión histórica d'esti productu milenariu, al traviés de diverses cates y tasties populares, concursos de cocina profesional y pa primerices, mesmo qu'esposiciones con oxetos que tradicionalmente s'usaron pa ellaboralo, fotografíes, y otros preseos típicos.

El Certame del Quesu Casín DOP ye una de les cites ineludibles del final d'agostu n'Asturies y va axuntar amás a un nutríu grupu d'espositores locales y comarcales, tanto del sector gastronómicu al traviés de la marca de calidá Alimentos del Paraísu, como del artesanal.

L'encargáu d'ufiertar el pregón va ser, nesta ocasión, el ganaderu, apicultor y influencer rural conocíu en redes sociales como «Picotazos», quien amás ye imaxe del spot de la DOP Quesu Casín d'esti añu cola yá popular vaca casina «La Casí». El Casín d’Oru 2025 va dir parar a manos de la restauradora Vivi Poli propietaria de la histórica Casa Zulima (Caliao, Casu) quien dende'l so restorán en plenu Parque Natural de Redes lleva siempres por bandera'l productu local y el quesu Casín que nunca falta na so carta. Como yá ye tradicional, va celebrase'l concursu de cocina pa profesionales y principiantes en collaboración col Círculu Gastronómicu de los Quesos Asturianos y que tien como oxetivos, ente otros, el fomentu de la cocina tradicional de Casu y la promoción del consumu de productu local y del quesu Casín en particular.

Otra de les novedaes d'esti añu ye que'l certame va cuntar cola so propia sesión vermú amenizada pola música de la bandina La Garrapiella. Amás, nel interior del Centru d'Interpretación del Parque Natural de Redes inaugurará la esposición «Queseres casines, ayalgues del tiempu», que va axuntar ferramientes y oxetos variaos que tradicionalmente s'usaron pa producir el Casín y que va amosar n'imaxes cuál ye'l procesu d'ellaboración d'esti quesu. L'amuesa ta comisariada por Alba López Garrido y va permanecer abierta hasta'l día 6 de setiembre. L'eventu va ser conducíu pol presentador y reporteru televisivu Juan Luis Más (Conexión Asturies, RTPA).