«Asoléyase Al verde d'El Cierru», obra ganadora del XXXI Premiu Máximo Fuertes Acevedo d'Ensayu

Al verde d’El Cierru, la obra ganadora del XXXI Premiu Máximo Fuertes Acevedo d’Ensayu que firma Iris Díaz Trancho, yá ta nes llibreríes. La novedá editorial llega a les llibreríes asturianes con una edición en tapa dura qu’atiende pa cada detalle: dende les cianotipies orixinales de l’autora que separten cada capítulu hasta l’acabáu efectu tela de les cubiertes con estampación de portada y llombu n’homenaxe a los manuales de botánica.

A partir d’una estructura de doce capítulos, l’autora afilvana unos testos que ponen en rellación los meses del añu con especies botániques que-yos son propies. Dende la observación sensible y posada del caminar d’un añu na finca familiar d’El Cierru, esti ensayu con vocación d’almanaque amuesa una mirada íntima que vincula la botánica a temes universales como la maternidá, el pasu’l tiempu, el deséu o la belleza. Too ello narrao con una prosa curiada a mediu camín ente lo ensayístico y lo poético.

El llibru, editáu por Cuatro Gotes, inclúi doce cianotipies orixinales a color feches a mano pola propia autora que vertebren la estructura de dolce capítulos, caúna de les cuales ta ellaborada con exemplares reales de les plantes, pertenecientes a la finca de la propia autora, que-yos son propies a caún de los dolce meses del añu.

Iris Díaz Trancho (Xixón, 1981) estudió la diplomatura de Maxisteriu pola rama d’Educación Infantil, pa más tarde graduase nesta mesma especialidá. Asina mesmo ta postgraduada col títulu d’Esperta en Filoloxía Asturiana y ye Máster n’Intervención Socioeducativa; too ello pola Universidá d’Uviéu. El so TFM, qu’algama la Matrícula d’Honor, xira al rodiu de la tresmisión interxeneracional del asturianu, ámbitu nel que trabaya anguaño como doctoranda, continuando cola mesma llinia d’investigación.

Nel planu lliterariu, pal públicu infantil tien espublizaos los llibros: «La caxa de cristal» (ALLA, 2004. Ganadora del premiu «Llectures pa rapazos»), «La neña de les trences al revés» (Trabe, 2009. Premiu FETEN a la meyor adaptación teatral), «Mio ma, la pirata» (Suburbia, 2010. Premiu de la Crítica d’Asturies) y «Vivo nuna casa malva» (Pintar-Pintar, 2011). No tocante al públicu adultu, cuenta colos llibros de rellatos «Nome» (Trabe, 2014) y «Pincelaes» (Trabe, 2014).

Llaboralmente, ye funcionaria de carrera de la Conseyería d’Educación asturiana, desarrollando’l so trabayu como maestra de Primaria, siendo amás coautora de los llibros de testu de l’asignatura de Llingua Asturiana de la editorial ANAYA y formadora docente al traviés de diferentes ponencies y comunicaciones en congresos y cursos. Ye tamién profesora, dende hai más d’una década, de la UABRA, con materies venceyaes a la Sociollingüística aplicada al casu asturianu.

De la mesma manera tien collaborao con diferentes medios de comunicación: asturies.com, La Nueva España y RTPA; tando asina mesmo comprometida anguaño coles asociaciones «Reciella, families pol asturianu» y «GRANA», de les que forma parte de la xunta directiva.