Denuncien una discriminación a la hora de presentar una tesis n'asturianu
Actualidá
El investigador Inaciu Galán tuvo qu'incluyir testos en castellanu a iniciativa de la Comisión de Doctoráu de la Facultá de Filosofía y Lletres
21 Jan 2020. Actualizado a las 18:02 h.
L'asociación Iniciativa pol Asturianu emitió una nota de prensa depués de la presentación na Universidá d'Uviéu de la tesis La llingua asturiana nel franquismu, del investigador Inaciu Galán, que tuvo qu'incluyir testos en castellanu a iniciativa de la Comisión de Doctoráu de la Facultá de Filosofía y Lletres.
El colectivu fala de «discriminación» hacia los investigadores que presenten tesis n'asturianu y pide a la institución universitaria que cambie'l so reglamentu pa garantizar que pueda presentase cualquier trabayu n'asturianu «n'igualdá de condiciones». «La esperiencia de les tesis n'asturianu remóntase yá a los años ochenta y ye el momentu de da-y un encaxe llegal definitivu», señalen dende Iniciativa.
Na nota distribuyida pola entidá, la situación que se vivió na Universidá demuestra qu'una persona nun pue utilizar l'asturianu «porque los derechos llingüísticos nun s'alcuentren recoyíos na llexislación vixente».
«Por nun tar reconocida la oficialidá del asturianu hai persones que nun tienen los sos derechos reconocíos nin puen facer usu del idioma de manera llibre y voluntariu», señalen. Amás, piden a los partíos políticos asturianos una «reflexión» sobre esta cuestión. «Facer les tesis n'asturianu y en castellanu supón un doble esfuerciu», afirmen.