El cañicón

Miles d'asturianos y asturianes medramos sintiendo a Xentiquina (primero Seliquín), un grupu de neños y neñes de la Escuela de Lieres que facíen canciones n'asturianu dirixíos pol maestru Nacho Fonseca. Un de los cantares más prestosos y conocíos foi 'El cañicón' que depués versionaría Dixebra pa convertise nun tema que solíen tocar en tolos conciertos pesie al so caracter infantil.

«Ven, ven, ven, ven a cañicate onde l'arbolón. Ven, ven, ven, que vas a montate en cuantes que baxé yo» diz l'estribillu. Y un cañicón, un columpiu, paeció l'Oviedo'l domingu pasáu contra'l Lugo. Un cañicón de sensaciones, de sentimientos, de tristures y alegríes. Como dixo un de los entrenadores más clásicos del fútbol asturianu «cuidao, el columpiu va y vien». Y foi y vino... Y acabo llegando pa da-y en focicu al rival y que los trés puntos quedaren nel Tartiere.

El cañicón llevó al equipu d'Anquela a un primer tiempu horrible. Les pantasmes d'un equipu muertu, ensin idees y que- y quemaba'l balón recorríen La Iría dexando a l'afición tan fría como les sensaciones del equipu. Frialdá menos a «los de detrás de la portería» que diría l'entrenador demostrando que l'apueste por una grada d'animación nun foi una mala idea, el Tartiere suena cuatro veces más qu'otres temporaes y eso que Xono ta empeñáu en que suene más.

El cañicón oviedista llevó a un segundu tiempu estremáu. Como'l que nun lu ve, el Lugo topóse con dos goles en cuatro minutos. ¿Un penalti rigurosu? Como l'orsai del primer gol gallegu. ¿Un gol de Linares? Claro, el pistoleru de Fuentes de Ebro tien bales p'aburrir.

Y el cañicón siguió ximielgándose ensin qu'apaeciera'l guarda'l parque que dicía'l cantar. Hubo momentu pa enfadase col gol del Lugo, de volvese llocu col gol d'Aarón y de ver a un equipu col oficiu que-y faltó tantes veces pa saber ciarrar el partíu ensin apuros.

Victoria pa crecer y pa creer. Y pa deprender a cañicase. Lleguen dos partíos siguíos fuera de casa, momentu de ganar yá fuera de La Iría.