Turismu, econonomía, cultura y sostenibilidá: retos d'Asturies nel futuru inmediatu

Asturies ye, por tradición ya historia, una comunidá con un fondu raigañu industrial. Tal tradición constitúi un valir social indiscutible qu’ha caltenese y afayase a los tiempos en forma d’industria de tresformación, de nueves teunoloxíes, de recuperación ecolóxica… Y too ello con un enclín de «sostenibilidá»; esto ye, faciendo que’l desarrollu deriváu d’esta actividá económica faiga lo posible por llograr el caltenimientu y la meyora del mediu ambiental na que se lleva a cabu.

Pero ye claro que, arriendes d’ello, Asturies va ser importante nos años vinientes -yá lo ta siendo- pola mor de les sos posibilidaes turístiques. N’efeutu, el cambéu climáticu, xunto con otros aspeutos como’l paisaxe, la gastronomía o la naturaleza, van xugar un papel determinante nel desendolcu d’esta otra industria, potencialmente tan relevante pa nós dende una perspeutiva económica. 

Los primeros ñicios de tal relevancia entamen a facese visibles nos branos asturianos estos caberos años: Uviéu y Xixón enllenos de turistes españoles y europeos, los Picos d’Europa y los Llagos con problemes loxísticos p’acoyer a más xente, Somiedu y el turismu d’avistamientu de la fauna xabaz na llende de les sos posibilidaes de desarrollu… 

Ye claro, entós, que se necesita un asitiamientu institucional (Gobiernu del Principáu y gobiernos llocales) pa definir el modelu turísticu qu’Asturies necesita. Les opciones pasen, nos sos polos estremos, por un turismu descontroláu y masivu (tipu mediterraneu) o por un turismu de calidá y caltenible (el modelu vascu, por exemplu).

Falando de la política turística nel País Vascu, convién sorrayar que’l so gobiernu acaba d’invertir nes últimes dómines al rodiu de 80 millones d’euros de fondos europeos Next Generation pa, al traviés del programa «Códigu Éticu del Turismu», dir a la busca d’un turista sensible y responsable, que fuxe de la masificación, que viaxa n’iviernu y en branu, y al que-y presta de mou especial averase a la gastronomía y a la cultura tradicional que s’espresa n’euskera, la llingua del país. Ye importante treslladar que, con estes polítiques, el turismu vascu recueye un 6% del PIB de la comunidá, lo que representa la bultable cantidá de 5000 millones d’euros d’aportación a la economía vasca.

Y ye que, al llau de la climatoloxía, del paisaxe y de la naturaleza, la llingua y la cultura d’un territoriu tamién son elementos fundamentales de la so economía darréu de la so rellación, ente otros factores, col turismu. N’Asturies, tal rellación yá foi plantegada por economistes de prestixu de la Universidá d’Uviéu (el Dr. José Alba, ente otros). Y ye qu’a la xente de fuera interésa-y la cultura material de los sitios que visita (arquiteutura tradicional, arte, monumentos notables…), pero présta-y tamién conocer el nome de les coses na espresión del llugar; nagua por poder contrastar tradiciones populares coles propies; esfruta cola mitoloxía, les vieyes lleendes y el folklor musical auténtico; o, nel casu de nueso, rellámbese probando,  «pixín», «frixuelos», «pitu de caleya» o… «un culín de sidra».

Llamentablemente l’autoodiu y l’autodespreciu de la cultura propia xueguen dacuando a la escontra de los intereses económicos d’Asturies. Va unes selmanes, por exemplu, asistíemos a un penosu espeutáculu cuando’l responsable d’un conocíu establecimientu de sonadía gastronómica nel occidente d’Asturies menospreciaba, énte la clientela y al alto la lleva, la cultura y la llingua de los asturianos calificándola de “inesistente, d’inventu y de nun tener tradición lliteraria…” Y too esto diciéndolo, paradóxicamente, na tierra del Padre Galo, de Nené Losada y d’Esther García López. En fin, va unos díes una guía turística esplicaba a un numberosu grupu de turistes andaluces, n’Uviéu y delantre la sede de l’Academia de la Llingua Asturiana, que n’Asturies naide nun falaba asturianu. En dambos casos, afortunadamente, eses manifestaciones espreciatibles de lo nueso fueron refugaes espontáneamente por persones ayenes que les sintieron como ofensibles.

De xuru que los anteriores son casos aisllaos y non xeneralizables nel sector turísticu asturianu, pero, con too, treslladen una fonda desconocencia del valir económicu de la cultura propia. Una patronal hostelera asturiana intelixente habría tresmitir hacia afuera la meyor versión d’Asturies: ta mui feo falar mal de lo propio a los visitantes y, amás, perxudica l’interés común. Camentamos, sicasí, que n’Asturies tamos a tiempu de reflexonar con procuru y d’afitar esa granible interrellación ente turismu, economía, cultura y sostenibilidá. Una Asturies caltenible, nesti sen y lóxicamente, namái podría entendese axuntando lo mediuambiental, lo cultural y lo llingüístico. Los responsables políticos tienen la pallabra. 

* Xosé Antón González Riaño es el presidente de la Academia de la Llingua Asturiana