Racismu nativista en Madrid

Fui con la familia a Madrid en un puente festivu. Dexeme llevar por tolos tópicos y aproveché el AVE y asina pude ver vascos, asturianos, andaluces y demás con cara de turistes mirando Madrid, porque la xente de Madrid taben toos n’Asturies esos dís. Madrid casi nin lo vi de tanta xente que había, nun se veín nin les baldoses de la acera, solo xente y xente.

El tren bien, salvo que lu llamen AVE porque hasta que sales d’Asturies vas a un pasu que te permite fotografiar los páxaros. Con la foto movía eso sí, porque hasta Campomanes traquetea como les diligencies de les películes del oeste. Agospiéme nun apartamento desos de la multinacional que suben el preciu’l alquiler. Nun me gustó munchu que el dueñu que llevaba fachaleco falase de «las chicas luego lo recogen», ya-y veía yo pinta de que nun fregó un váter en la vida. Pidiómos que firmáramos que dibamos por cuestión de trabayu, porque el vecindariu nun quería turistes. Nun dixi ná, pero prometime a mí mismu quitar la cara de Paco Martínez Soria que tengo yo en cuantes piso Madrid. Pero ná, fue veme el porteru y ya me catalogó como turista sin salvación ninguna.

El casu ye que como respetuosu que soy colos sitios que visito traté de empapame de la cultura indíxena y pasar desapercibiu. Asina que miraba tolo que había al mi rodiu cuando salí del apartamentu. Entamaren les sorpreses nel ascensor. Tenía un cartelu de la policía nacional. Decía el cartelu que si veis daqué raro na to puerta o la de un vecín llamares a la policía. Recomendaba poner dos cerradures y de les buenes, que ya decín que yera una «pequeña inversión» y que nun te olvidares de poner la alarma, por lo que ya se suponía que la tenís. Salí del ascensor ya ermoliu de qué sitiu había dio a parar y tópome otru cartelu de la comunidá de Madrid anunciando el serviciu «112 ocupación». Un teléfonu 900 gratuitu pa denunciar sin pérdida de tiempu cualquier ocupación con k. Ya con eso per terminé de veme acoyonau. Esto ye el acabose, ¿onde vini a dar?

Ya na cai fui enterándome de quién yera el culpable. Había una farola con un cartelu pegau con la foto del Perro Sánchez en blancu y negru y la palabra «traidor» en grande. Y más allá, nun armariu de alumbrau públicu otru cartelu diciendo que el país taba siendo destruíu, pero «eso sí todo muy progre que es lo que importa». Y eso que faltaben meses pa que saliese el tema de los gochos puteros. Una vegada que supi que el problema de los Okupas los lladrones y en xeneral del país yera mía que soy progre. Míreme por si traía daqué bandera palestina o similar que mostrase lo que soy. Visto que non, ya más tranquilu, aunque la barba y la gorra me delaten como paisanón de izquierdes, continué el paseu dispuestu a cantar el cara al sol si facía falta pa salvar la vida, visto que taba’n territoriu enemigu. Alcontré n’otra farola una foto de un nenín. Foto en color además con colores guapos y amables y dixi, menos mal, esti nenu nun pue traer na malo, seguru que nun ye progre nin vota al Perro. Asina que acérqueme y vi que yera un anunciu del Conceyu de Madrid.

Resultó ser un «chulapo» según se veía escrito na semeya. El cartelu colgau la farola y de cientos de faroles de Madrid yera una campaña del «plan de fomento de la natalidad y la conciliación», que nun sé cómo sofita la conciliación llenar les faroles de semeyes de un nenu tirando a roxu, gueyos claros y con un gorretu paeciu al míu. Decía la semeya del nenu «Lo maravilloso de traer un chulapo al mundo». Yo que soy muy neneru nun voy negar que el rapacín tenía una sonrisa que taba pa comelu. Asina vese que ye maravilloso, lo de cambiar pañales y llevantase a les dos de la mañana porque tien gases, eso son detalles menores y ya se ocupa «la chica». Si había chulapo, tenía que haber chulapa y ellí taba, nun mupi. La chulapa en vez de gorretu, traía una rosa na solapa, sonreía como si nun hubiera un mañana y yera tamién blanca como una cuayá y de gueyos claros.

Anantes de proclamar xuicios sobre la campaña del chulapu y la chulapa, decidí conocer meyor el mundu indíxena y seguí paseando a ver cuantos chulapos y chulapes se veín per ende. Vi una falafería, una hummusería y una cevichería. Tamién pasé al pie de una smash búrguer y en xeneral de munchos búrguer con diferentes apellíos, toos en inglés. También vi el taste of américa, el cookie lab que yera una «american bakery», que taba enfrente de the beauty room. Entereme que «lefties» ye una tienda de ropa y non un sitiu pa que los paisanones de la Cuenca que vamos a Madrid faigamos una asamblea, como ún podía pensar si torna lefties por izquierdosos. Asina podría seguir y enllenar 20 folios de nomatos ingleses. Hasta vi una iglesia, la «great awakening church», que si nun tuviera en Madrid pensaría que yera como el colmo de lo woke, pero nun sé por qué me paez que ye pal otru sen.

Lo del inglés toy ya avezau, porque nel trabayu enseñete «slides» que falen del «networking», el «target», el «core», el «venture capital» y otru montón de coses superemocionantes que te cuenten tipos con la banderina de España na muñeca. Eso sí ofendense munchu pol gallegu, el catalán o l’asturianu. Hay que falar en cristiano, que el spanglish esti paez que ye cristiano. Take away, coming soon...Madrid is my stile (esta reconozco que me superó y saqué foto pa que naide me llamase mentirosu). Vi una banderona de España en una tienda, yera un chinu que tenía fruta a la venta y abría los domingos. Había en toles tiendes persones migrantes y racializaes atendiendo. Na cai Serrano vi un peazu paisanu negru con sombreru de copa faciendo de porteru de un hotel. Entrugueme si sería un extra de una película, pero non, yera real.

Vi xente de tolos colores y vestíos, xente real, pero nun paecín chulapos nin chulapes. Vi un grupo de animalistes con perros pa adoptar pidiendo perres a la xente que pasaba. El aspeutu yera variopintu, nel vestir, nes colgadielles y nos tatuaxes. Tampucu yeren muy coincidentes col chulapu y la chulapa de la foto.

Llegué a la conclusión, por eso soy un zurdu mal bichu, que la campaña del conceyu de Madrid nun tien na que ver col fomentu de la natalidad, sinon col racismu nativista y el fanatismu de quien lu gobierna. Nun falten nenos y nenes, lo que falta ye que sean de piel clara y gueyos claros y que vistan adecuadamente y nun se pongan colgadielles na nariz, que sean como «Dios manda» y nun voten al Perro, sobre tó eso. El nacionalismu racista permite les coses en inglés porque eso va dientro del capitalismu y eso ye la esencia de Madrid. Vas al teatro real y un starbucks, entres nel museu del Prado, Amazon, Iberdrola en la Plaza mayor o en Sol. El Corte inglés y cortylandia como el gran atractivu turísticu de la Navidad en Madrid. Los anuncios de Tio Pepe o Schweppes como símbolu identitariu de Madrid. Esi ye el sentiu de que la mayoría de comercios tuvieren nomes en inglés, que rinden cultu al capitalismu, el dios principal de Madrid. Entre tantu despropósitu tengo que decir que vi una tiendina que ponía «Yokosoarreglo» que me paeció un actu de resistencia.

Pero volviendo a la chulapina y el chulapín. Nun son un reflexu del Madrid real, nun tienen nada que ver con la vida real de la capital, ye una concesión al fanatismu ideolóxicu del gobiernu de Madrid que nun afronta los problemes reales pero sí ta esmoleciu porque el futuru será mestizu y mulatu. Esa ye la razón del sofitu del PP de Madrid al xenocidiu. La multiculturalidad nun ye una opción ye una realidá. La cuestión ye como lo xestionamos, non si lo hay o nun lo hay. Facer esos cartelos y gastar eses perres en dar esa imaxen de los nenos y nenes de Madrid ye vivir nun burbuxa, onde la mayoría dellos y delles nun cumplen el so propiu estándar. Pero tamién ye una forma de perpetuar les clases sociales pa garantizar la dominación y que el del fachaleco del apartamentu que alquilamos siga sin limpiar un váter.

El racismu va acorde col capitalismu xavaz del que Madrid ye víctima y tien como función permitir la explotación de les clases populares y el mantenimientu de los privilexios de les clases dominantes. El imperialismu y el colonialismu entamen en casa y finen en Palestina. Cuando volvía pa la mio Asturies acordábeme del nenín de la semeya, tan queríu, probablemente inmigrante de Europa del este. Y pensaba na cai Corrida de Xixon, enllena de franquicies y cartelos n’inglés. Quiciábes soy como Martínez Soria, pero non en Madrid, sinon nesti sieglu XXI que nun acabo de entender. O que lu entiendo demasiao bien.