«Cellero» apuesta por renovar el monólogu asturianu adoptándolu a les lleendes urbanes actuales

El monologuista y actor Carlos Alba «Cellero» apuesta por un procesu de renovación del monólogu asturianu, adaptando y versificando pa ello les muches «lleendes urbanes» actuales que circulen de boca en boca y per redes sociales.

L'artista defende que «gran parte de les histories del monólogu asturianu vienen de la tradición oral, y tán documentaes n'otros países y n'otres rexones d'España. Son cuentos que se contaben, pero n'Asturies lleguen a tener una reforma, porque los escritores dáben-y forma en versu», añadió.

Asina, pon d'exemplu monólogos como Requisitoriu, de Pepín de Quevedo, que tien la so versión en Los prestamistas no tienen alma, d'Aurelio Espinosa, incluyíu nuna colección de cuentos tradicionales de Castiella y Lleón. También mentó Les tres chaquetes, d'Anxelu, que'l propiu «Cellero» sintió a un amigu d'orixe andaluz. Recientemente, comentó, Pin de la Cotolla contó un chiste versificáu, «una práctica que sigue faciéndose».

Lo que Carlos Alba plantea ye facer esto mesmo coloa qu'él llama lleendes urbanes. «Histories que rulen per Internet, como la moza de la curva, la de la paisana que metió'l gatu nel microondes, o la de la que confundió'l poliuretanu con xampú», exemplificó. «Avecen ser noticies falses, pero espardíes».

Versificar estes mesmes histories, y adaptales creando tamién nuevos personaxes, como por exemplu'l rapaz de barriu que sustituya al aldeanu o llabriegu de monólogu tradicional, son pasos que Carlos Alba propón pa dir avanzando hacia la renovación del xéneru.

También echó de menos más estudios sobre'l monólogu. «Nun hai una tesis nin un ensayu curiosu de xente investigadora», falta qu'intenta iguar colos sos análisis.

---

---