Suatea, UXT y CCOO apoyen el programa d'asturianu vehicular, pero piden la oficialidá

Los tres sindicatos reclamaron tamién la reconocencia de la especialidá docente pal profesoráu


Oviedo

Los sindicatos Suatea, UXT y Comisiones Obreres mostraron la so conformidá col proyectu pilotu pa impartir asignatures utilizando l'asturianu como llingua vehicular en dellos centros de la rede educativa, anque reclamaron la reconocencia de la especialidá docente pal profesoráu. Representantes de los trés sindicatos refiriéronse al anunciu realizáu agora poco pol conseyeru d'Educación, Genaro Alonso.

«Paeznos positivo», señaló Enrique Fernández (CCOO), «Pero'l verdaderu oxetivu ye la cooficialidá d'asturianu, y ési ye'l fin últimu», añadió, «y ello pasa pela escolarización».

Enma Rodríguez, de Suatea, considera que se trata «d'una demanda» que lleva yá munchos años, y esta midida «pue valir, non solo pa frenar el retrocesu (d'hores llectives de Llingua Asturiana), sinón tamién pa incentivar y recuperar a aquéllos que nun teníen esa ufierta que per otra parte yera demandada por bastantes families nestos centros». Consideró que'l procesu ye «un pocu lentu, y esperamos que d'equí p'alantre vayan les coses con un pocu más de dinamismu». Eso sí, matizó que la falta d'oficialidá del asturianu «ye una torga», argumentu «utilizáu» pol Gobiernu central pa torgar les meyores.

Maximina Fernández, d'UXT, entendió que «lo prioritario ye la reconocencia de la especialidá docente» de Llingua Asturiana. «El ministeriu pása-y la pelota al Principáu y el Principáu al Ministeriu», criticó. «Qu'empiecen nos centros faciendo estos esperimentos paeznos mui bien, pero queremos con una base llegal», aprofió.

Los tres sindicatos reuniránse'l próximu vienres col conseyeru d'Educación pa que-yos informen sobre'l programa pilotu.

Valora este artículo

0 votos
Comentarios

Suatea, UXT y CCOO apoyen el programa d'asturianu vehicular, pero piden la oficialidá