Un país como esti nun ye'l míu

AGORA

13 jun 2019 . Actualizado a las 18:14 h.

Hai dos hashtags rellacionaos con Asturies que tán mui activos últimamente en Twitter: #cachopos y #AsturiesArde. Ente los dos resumen les llendes distópiques peles que discurre la nuesa res publica: grases saturaes que pasen por gastronomía tradicional y desaniciu d’un entornu natural que se vendió y se viende como imaxe turística. Siguimos llamando «prerrománicu» al Arte Asturianu (y dexándolu cayer, mentanto) y nun pasa día ensin fatwa consentida escontra’l llobu, pero lo qu’importa ye que quiten l’Impuestu de Sucesiones, porque ta visto qu’esti millón curtiu de persones ye fundamentalmente rentista y si nun domina’l mundu ye por discreción atávica, que nun va ser por perres.

Tenemos l’Asturies que merecemos, xusto esa y nenguna otra. Nin los que fixeron la Modélica Transición s’esmolecieron por imaxinar otra cosa qu’una provincia madrilana, nin la xeneración siguiente fixo gran cosa por condicionar a los nuestros representantes políticos pa que, yá que nun se rebelaben, polo menos protestaren en plan vocales d’asociación de vecinos. De la xeneración qu’estrena mesa y mantel na alministración de la cosa común, tampoco nun s’espera que pase de calcu y caricatura de les elites españoles: la retórica de la responsabilidá ye nesta tierra un mantra interxeneracional.

Tamos como pa facer profecíes. Por nun tener, nun tenemos nin siquiera un relatu d’escayencia: siguimos esportando grandonismu y usando’l significante “asturianos” como si a estes altures valiera gran cosa. ¿De qué asturianía tamos falando cuando nos aprovez defender lo mínimo que cualquier pueblu considera patrimoniu inalienable, a saber, la llingua propia? Lo de menos ye que’l presidente de la comunidá autónoma tea pluriempleáu como xestor (o como se llame) d’un partíu deprimente, o que la esquierda nueva tenga que pidir permisu a Pablo Iglesias pa desobedecer les directrices de Pablo Iglesias, o que la derecha de tola vida xuegue a ser dos y a ser una en caúna de les dos, como San Agustín. Lo que pasa na cai Fruela d’Uviéu cada vez tien menos que ver cola Asturies real, la que bazcuya ente’l cachopu y l’incendiu pente les ruines monumentales del arecismu. «Un país como esti nun ye’l míu», escribió Saint-John Perse. Divisa que voi grabar nel escudu d’armes que como rentista inconsciente seguro que me correspuende.