El cronista oficial d'Asturies, Fermín Canella discurrió esti apellíu pa diferenciala d'otres Tapies qu'existíen n'España.
13 jun 2019 . Actualizado a las 18:24 h.El conceyu y villa del Occidente asturianu de Tapia ye de Casariego dende 1916, depués de que'l cronista oficial d'Asturies, Fermín Canella, discurriera esti apellíu pa diferenciala d'otres Tapies qu'existíen n'España. Asina se recueye nel llibru Historia de Tapia a través de sus calles, de los autores Diego Fernández y Camilo López, amás de nes investigaciones del filólogu tapiegu Xosé Miguel Súarez.
El Conseyu de Gobiernu del 10 de xineru, el primeru de 2018, aprobó'l decretu pol que se determinen los topónimos oficiales de Tapia, San Tiso d'Abres y El Valle Altu de Peñamellera, polo que na actualidá 59 de los 78 conceyos asturianos tienen yá aprobada la toponimia tradicional. Ente tolos cambios destaca'l de la villa de Tapia, que pierde l'apellíu de Casariego.
Según se recueye nel llibru, el nome de Tapia de Casariego ye una invención moderna del que daquella yera cronista oficial d'Asturies, Fermín Canella. Asina, en 1907, l'Institutu Xeográficu y Estadísticu de Madrid pidió-y a la Diputación Provincial que-y punxere un apellíu a Tapia porque había otres localidaes col mesmu nome n'España y podía confundir.
Entós, la Diputación dirixóse a Canella y ésti discurrió'l de Casariego n'homenaxe al marques de Casariego. Asina, un acta del Conseyu de Tapia fechada'l 9 de xunetu de 1916 diose por enterada del Real Decretu, qu'a propuesta de la Real Sociedá Xeográfica, cambió la denominación del Conceyu, que pasaba a ser Tapia de Casariego, anque nun facía referencia al cambiu del nome de la villa.
Según recueye'l filólogu tapiegu Xosé Miguel Suárez nel artículu Dalgús datos novos da toponimia del occidente d'Asturias, publicáu nel númberu 68 de la revista científica Lletres asturianes, el nome de Tapia de Casariego ye popular ente los turistes, «pero la xente sigue usando tanto pal conceyu como pa la villa el nome de Tapia a seques». Amás, nel artículu mentáu esplica que'l nome orixinal del marquesáu, «pa más destrozu toponímicu», vien del llugar de Casarego, al sur de Tapia.