La oficialidá supondría'l 0,5% del presupuestu autonómicu

El presidente de l'Academia de la Llingua Asturiana, Xosé Antón González Riaño, afirmó qu'anque «l'exerciciu de derechos democráticos nun pue depender del so coste económicu», poner en marcha la oficialidá de la llingua asturiana supondría'l 0,5% del presupuestu autonómicu.

Asina lo indicó'l presidente de la institución na potencia inaugural de les XXXVII Xornaes d'Estudiu, que se celebren dende esti martes hasta'l xueves na Facultá de Filosofía y Lletres de la Universidá d'Uviéu.

Riaño esplicó que'l coste de la oficialidá sería una co-responsabilidá ente la comunidá autónoma y l'Estáu, polo qu'Asturies recibiría inversiones pa la materia como pasa nestos momentos en territorios como Galicia, País Vascu, Navarra, Comunidá Valenciana o Cataluña, informa Europa Press.

Amás, dixo que declarar la oficialidá supondría una inversión al ser un elementu de dinamización de la industria cultural n'Asturies. Punxo d'exemplu qu'habría una promoción mayor de la lliteratura infantil, de la música y del teatru fechu nesti idioma, amás de la posibilidá de promocionar los llibros editaos nesta comunidá fuera de les nuestres fronteres.

Procesu por fases

Riaño esplicó que la oficialidá, una vez declarada nel Estatutu tendría que ponese en marcha al traviés d'una Llei de Normalización que podría tar aprobada nun plazu de dos años. Nesi momentu, el procesu tendría que facese per fases.

Pa llevalo alantre destacó un alcuerdu col Gobiernu central pal usu de la toponimia asturiana, una presencia mayor del idioma en RTPA y l'usu del asturianu polos Conceyos, onde punxo en valir la necesidá d'alcuerdos col Principáu y la collaboración ente mancomunidaes pa optimizar recursos-.

Per otru llau, al Gobiernu asturianu tendría que facer un apueste pol billingüísmu en tolos ámbitos de l'Alministración, amás de pola la presencia del idioma en tolos niveles educativos.

---

---