El Principáu «satisfechu» col grau d'aplicación de la norma, mentes que l'Academia fala d'incumplimientos
13 jun 2019 . Actualizado a las 18:42 h.El conseyeru d'Educación y Cultura, Genaro Alonso, mostróse esti martes «sartisfechu» cola política llingüística desarrollada pol Gobiernu porque «fiximos lo que teníemos que facer». Sicasí, la vicepresidenta de l'Academia de la Llingua Asturiana (ALLA), Marta Mori, destacó qu'existen «promeses incumplies» como implantar la llingua n'Educación Infantil, «que ye dalgo que diz la Llei d'Usu y nun se fixo».
Alonso y Mori afirmáronlo asina en declaraciones a los medios minutos enantes de participar nel actu institucional de la 40 Selmana de les Lletres, celebráu na Xunta Xeneral y onde, xunto a les autoridaes, participaron escolinos nuna llectura pública de testos n'asturianu y gallego-asturianu.
Nesi sentíu, Alonso animó a los asturianu a falar y escribir n'asturianu pa «caltener una llingua milenaria» y afirmó que dende la Conseyería fixeron un apueste por «normalizar lo que tien que ser normal» al traviés del usu d'esti idioma nel sistema educativu y nos medios de comunicación.
A selmanes d'acabar la llexislatura, el conseyeru dixo que marchaba «satisfechu» del cargu, «porque fiximos lo que queriemos facer» según lo que permite la Llei d'Usu, con midíes como'l Plan Pilotu del Asturianu nes escueles o «facer ver que nun hai nengún problema n'usar l'asturianu, porque les llingues son pa entendenos non pa crear conflictos».
Sicasí, dende l'Academia de la Llingua Asturiana nun fixeron un balance tan positivu. Asina, la vicepresidenta d'esta institución, Marta Mori, afirmó que'l balance «tien muncho de meyora". Asina, fala de "promeses incumplies» como implantar la llingua asturiana n'Educación Infantil, «que ye dalgo que diz la Llei d'Usu, pero que nun se fixo».
Tamién faló de como la crisis supunxo que les ayudes a la industria cultural n'asturianu menguaren, igual que la financiación de l'Academia, «con una rebaxa enorme dende los últimos años», o los problemes que supunxo pal estatus xurídicu de la institución nun tener una llei específica.
Oficialidá na llexislatura próxima
Esti 26 de mayu, el PSOE asturianu va presentase, pela primer vez, a les elecciones autonómiques cola oficialidá nel so programa electoral. Con too, a preguntes de los medios, Genaro Alonso, nun quixo entrar nel debate del modelu d'oficialidá a l'asturiana.
«Eso entra nel espaciu de les suposiciones», esplicó'l conseyeru, para añadir que tovía nun se sabe cómo va tar conformada la Xunta Xeneral, que fuercies van facer apueste pola oficialidá o cómo va aparecer nos programes electorales del PSOE y del restu de partíos «polo que nun quiero aventurar como va ser esi modelu d'oficialidá».
«Nós queremos acabar el marcu que nos dimos, que ye la Llei d'Usu, ensin perpasalo, lo que venga depués será lo que digan los asturianos», dixo'l conseyeru.
Per otru llau, la vicepresidenta de l'Academia pidió al Gobiernu próximu un «apueste pol asturianu de manera más decidida». «Con oficialidá o ensin oficialidá, porque la Llei d'Usu tien un marxe abondo más grande d'aplicación del que-y tán dando», señaló en declaraciones a Europa Press.