Asturies, el meyor llugar del país para el turismu en el 2050 gracies al cambéu climáticu yera'l títulu d'un artículu en prensa asturiana espublizáu esta primavera. Ensin decatase qu'ente les consecuencies pal mediu ambiente rescamplen la degradación del paisaxe natural y l'impautu sobre'l patrimoniu hestóricu, cultural y llingüísticu. Poro, fai falta enfotase nun turismu sostenible que caltenga la capacidá de carga ecolóxica y cultural de la sociedá asturiana. Estos impautos puen orixinar refugu ente los ciudadanos de la comunidá afeutada asina como ente la perceición de los turistes.
D'esta miente, nun taría de más refugar el turismu masivu en cuenta de les llinies propuestes va unos venti años pol Conseyu Mundial de Viaxes y Turismu: Les empreses de viaxe y turismu han sopelexar el so compromisu con un xorrecimientu compatible col mediu ambiente. Han afitase los oxetivos de meyora ambiental. El compromisu ambiental ha d'almagar la totalidá de la empresa. Ha llograse identificar y minimizar los problemes medioambientales del productu ufiertáu na so planificación y na so práutica. Sensibilidá cola conservación de les árees amenazaes o protexíes, les especies y el panorama del paisaxe. Afondar nel aforru d'enerxía. Reducir, reutilizar y reciclar. Xestionar l'agua potable y control de la residual.
Amenorgar los niveles de ruíu. Esaniciar productos tósicos pal ambiente. Respetar los llugares hestóricos. Caltener el respetu pola llingua autóctona, les tradiciones y cultura del territoriu visitáu. Pocos llugares siguen llibres d'uniformización cultural y la desfecha de los ecosistemes. Torgar el desaniciu natural fechu en nome del turismu nel mediterráneu. Amás de protexer una imaxe turística acordies cola sensibilidá de los turistes qu'aporten de países más educaos nes temes medioambientales, ye protexer los recursos d'un mou sostenible pal nuesu país.
Y non como afitaba l'artículu citáu al entamu poner el dineru como únicu valir de la industria turística asturiana. Nel 2017, hebo un récor de 2.320.770 turistes (SITA) pa una población de 1.034.960 habitantes d'entós (SADEI). En xeneral, el seutor servicios nun pue plantegase como alternativa a la decayencia de la minería, ensin facer un apueste pola investigación, el mediu rural y los recursos hídricos, forestales y de biodiversidá d'Asturies. Nel Día Européu de los Parques Nacionales remembróse que'l de los Picos d'Europa, fundóse nel 1918 y ye'l más antiguu n'España. La rede d'estos llugares protexíos suponen un soporte vital básicu p'Asturies.