Na prueba van participar más de 200 corredores de 19 clubes
10 ago 2019 . Actualizado a las 05:00 h.Uviéu acueye esta fin de selmana una edición nueva de la Vuelta Ciclista a Vetusta. La prueba ta subvencionada pol conceyu de la ciudá y nella van participar 200 corredores de 19 clubes distintos.
El conceyal del equipu de gobiernu, Gerardo Antuña, presentó, xunto al exciclista y actual seleccionador de la Federación Asturiana de Ciclismu, Santi Pérez, y el presidente del PCM Team Oviedo, Monchi Álvarez, una edición nueva de la prueba. Antuña destacó que «tolos clubes tienen yá nes sos axendes una carrera» que va volver asitiar a la ciudá como «capital del deporte».
Nella, van participar «200 corredores de 19 clubes distintos, 3 d'ellos de calter internacional. Ente ellos cuntamos cola selección nacional d'Arxelia, el Benros colombianu y el MVK12 d'Andorra». El conceyal remató la so intervención recordando'l compromisu del actual equipu de gobiernu con eventos d'esti tipu, qu'amás de ser importantes como «actividá deportiva, son un polu d'atracción pa turistes».
Pérez y Álvarez detallaron les característiques técniques d'esta prueba, na que, na xornada inaugural, los corredores van encarar un percorríu de 142 kilómetros, con entamu nel Palaciu de Congresos d'Uviéu. A lo llargo d'esta etapa los ciclistes van xubir los puertos del Altu de Fuexu, Altu de Santirso, Alto de Cueru y El Violeo para rematar nel Naranco.
La etapa del domingu va suponer otros 143 kilómetros. Nesta ocasión, los ciclistes van encarar l'Altu de la Encruciada, l'Altu de La Campa y los trés pasos pol Altu La Belga. La meta final va allugase na cai Uría. Según esplicó Pérez esta segunda etapa de la Vuelta a Vetusta va tener l'aliciente de ser el campeonatu d'Asturies en ruta pa les categoríes Élite y Sub23.