Un percorríu pelos más de mil años de la llingua asturiana

La esposición «Voces. La Llingua n´Asturies al Traviés de los Sieglos» repasa les distintes etapes y socesos históricos que conformen el pasáu de la llingua

Exposición «Voces. La llingua n?Asturies al Traviés de los Sieglos»
Exposición «Voces. La llingua n?Asturies al Traviés de los Sieglos»

Redacción

Ye importante tener claro d'ónde se vien para saber a ónde se va. Ye una máxima aplicable a tolos ámbitos de la vida, tamién a les llingües. L'asturianu llucha pol so futuru, y pa ponelo en valor ye importante conocer el so pasáu. Pa dar a conocer la so importancia contribúi la esposición «Voces. La llingua n’Asturies al Traviés de los Sieglos», que fai un percorríu al traviés de los más de mil años de la hestoria de la llingua asturiana, afayando les distintes etapes y socesos históricos que conformaron el so pasáu, arriquecen el presente y proyecten el so futuru nel sieglu XXI.

Les persones que s'averen a visitar la esposición van conocer «la evolución y la capacidá humana d'adaptación del llinguaxe, suxetu de contino a cambeos y diversificaciones», espliquen dende'l Conceyu de Xixón. Trátase d'un «fondu viaxe» dende los ástures hasta los movimientos sociales d'anguaño a favor de la recuperación y revitalización del asturianu, pasando pela so rellación coles llingües indoeuropees y romániques, l'apaición de los primeros testos y nicios lliterarios, el desenvolvimientu de la so lliteratura y la definición d'una identidá llingüística asturiana que nos últimos años del sieglu XIX ye oxetu d'estudios filolóxicos y científicos.

La esposición preséntase nun formatu qu'inclúi paneles espositivos, documentos, imáxenes y obres lliteraries. "Voces" surde nel contestu del programa d'eventos que'l Gobiernu d'Asturies llevó a cabu nel añu 2018  col propósitu de conmemorar el XIII Centenariu de los oríxenes del Reinu d'Asturies (718-2018) que coincidió al tiempu col I Centenariu de la Creación del Parque Nacional del Monte de Cuadonga y el I Centenariu de la Coronación de la Virxe de Cuadonga.

Un equipu de profesores de la Universidá d'Uviéu formáu por Xulio Viejo Fernández, Ramón d'Andrés Díaz y Roberto González-Quevedo González ye'l responsable de los conteníos espositivos. El profesor Xulio Viejo ye, amás, el coordinador científicu y autor de los testos del catálogu. El diseñu y maquetación son obra del diseñador gráficu ya ilustrador xixonés, Juan Hernaz. Amás de les visites abiertes al públicu polo xeneral nel horariu d'apertura del Centru de Cultura Antiguu Institutu, ufiértense visites guiaes que van tener una duración d'una hora y los grupos van ser d'un máximu de 15 persones.

Los díes de les visites son el 14 d'agostu (de 11.00 a 12.00 hores); 21 d'agostu (de 18.00 a 19.00 hores); 23 d'agostu (de 11.00 a 12.00 hores) y 28 d'agostu (de 18.00 a 19.00 hores). Les visites son gratuites. Pa poder participar nelles, ye necesario unviar unes solicitú al corréu electrónicu llinguaasturianaxi xon.es, indicando nome y apellíos, cuántes persones quieren asistir y en qué fecha.

Comentarios

Un percorríu pelos más de mil años de la llingua asturiana