Educación anueva los conseyos escolares col retu d'implicar a los padres

I.A. REDACCIÓN

AGORA

un alumno en un aula, clase, vacía

Namái'l 6% de les families asturianes reconoz tener una participación activa

19 ago 2019 . Actualizado a las 05:00 h.

Aumentar la participación activa de les families. Esti ye'l retu col que'l Principáu convoca la elección de miembros de los conseyos escolares nos centros de los distintos niveles educativos non universitarios sosteníos con fondos públicos. Los últimos datos oficiales, que se remonten al añu 2014 señalen que namái'l 6% de los padres asturianos participen nos conseyos escolares, de los que tamién formen parte los directores de los centros, el personal d'alministración y los docentes. Esi foi'l resultáu pocu esperanzador d'una macroencuesta fecha pol Conseyu Escolar del Estáu. El datu rexonal ta bien per debaxo de la media nacional, allugada nel 12,2%. Mientres los colectivos traten de ganar pesu na toma de decisiones, la base que los sofita paez escasa. 

La nueva convocatoria d'elecciones pa integrar los conseyos escolares va ser una nueva prueba de fueu. Les bases, publicaes nuna resolución del pasáu 7 d'agostu, y roblaes pola nueva conseyera d'Educación, Carmen Suárez, establecen que les elecciones van celebrase en tolos centros privaos sosteníos con fondos públicos y nos siguientes tipos de centros públicos: escueles d'educación Infantil, sacante les qu'impartan namái primer ciclu; colexos d'Infantil y Primaria, centros específicos d'Educación Especial, centros d'educación básica, institutos d'enseñanza secundaria obligatoria, institutos d'educación Secundaria, centros d'educación de persones adultes y centros d'enseñances de réxime especial, sacante los centros d'enseñances artístiques de grau superior.

Les xuntes electorales de los centros públicos van constituyise na segunda quincena del mes d'ochobre y van ocupase d'entamar el procedimientu d'elección. Los directores van ser los responsables d'entamar, coles debíes garantíes de publicidá ya igualdá, el sortéu de los componentes, titulares y suplentes, d'eses xuntes electorales. Pa poder cumplir esti requisitu han tener ellaboraos los censos electorales. Ente'l día de publicación de les llistes provisionales de los candidatos y la fecha de les votaciones van tener que trescurrir ocho díes naturales, establez la resolución.

La normativa tamién concreta que les elecciones van tener que celebrase na primer quincena del mes de payares. Esto implica que los directores han de poner en marcha tol procedimientu al so regresu al centru, el día 2 de setiembre, y que los conseyos escolares van quedar constituyíos oficialmente enantes de rematar el primer trimestre.