Un curtiumetraxe asturianu va participar nel certame más importante de Grecia

El guión ta inspiráu na hestoria real d'una de les families que marcó'l destín de la villa marinera de Llastres: los Victorero


Redacción

El proyectu de curtiumetraxe «Los Señores Valdomero» ye unu de los catorce escoyíos pa participar nel 6u Drama PitchingLab qu'entama'l Drama International Short Filme Festival, el certame de curtiumetraxes más importante de Grecia y del sureste d'Europa.

La directora catalana de raigaños asturianos Marta González De La Vega va presentar el so tercer proyectu de curtiumetraxe, «Los Señores Valdomero», ambientáu na posguerra asturiana. El guión de la nueva cineasta inspírase na hestoria real de les families que marcó'l destín de la villa marinera de Llastres: los Victorero. Los seis hermanos viaxaron a Méxicu onde se fixeron ricos colos sos plantíos d'algodón y tornaron al so pueblu natal convertíos en verdaderos indianos.

Col amagüestu y la esfoyaza como telón de fondu, los personaxes de González de La Vega remembren asina la rellumanza indiana previu a la posguerra. Una fortuna fecha en Méxicu, un pueblu fundíu na miseria y la nueche d'ánimes son l'escenariu d'esti drama históricu que se va rodar el próximu 2020 en Llastres y que cunta col sofitu de l'Asturies Paraísu Natural Film Commission.

L'orixe llastrín de la familia de Marta González de La Vega (Lleida, 1989) foi la principal fonte d'inspiración pal desarrollu de «Los Señores Valdomero». Somorguiada na posproducción de «Neu», la moza lleidatana va asistir al 6u Drama Pitching Lab pa presentar y desarrollar «Los Señores Valdomero» del 15 al 22 de setiembre.

El Pitching Lab ye un espaciu de creación y desarrollu de curtiumetraxes con percorríu internacional. A lo llargo d'una selmana, los cineastes de los catorce proyectos escoyíos d'Estaos Xuníos, Corea, Reinu Xuníu, Grecia, Alemaña, España y Bulgaria van desarrollar los sos respectivos proyectos y van presentalos énte un panel de productores potenciales.

Comentarios

Un curtiumetraxe asturianu va participar nel certame más importante de Grecia