Dende'l Rosal F. C. busquen patrocinadores y refuguen «empreses que comercien col deporte, y al tiempu, cola salú poniéndonos en riesgu de cayer n'adicciones qu'arruinen families»
29 ago 2019 . Actualizado a las 05:00 h.Nel fútbol profesional la presencia de les cases d'apuestes como empreses patrocinadores ye cada vuelta más habitual. Una circunstancia que provocó crítiques d'aficionaos y asociaciones que lluchen escontra la ludopatía y escontra los equipos que cueyen el dineru d'esti tipu de compañíes. Dalgo que nunca va facer el Rosal F. C. Porque'l club uvieín, que cumple 90 años, nun va llevar esti tipu de publicidá na so camiseta por motivos éticos. Asina lo esplicaron dende'l mesmu club nel comunicáu col que punxeron en marcha la campaña de patrocinios pa la próxima temporada.
«El Rosal F. C. sigue de pretemporada, presentando'l nuevu proyeutu deportivu que va salir a competir a finales de setiembre nuna nueva temporada...y, pasu ente pasu, van perfilándose toles estayes como ye'l casu de los patrocinios que son los que dexen al club caltener la guo actividá», indicaron dende'l club raxón pa manifestar de siguío'l so refugu a collaborar coles cases d'apuestes, «qu'enllenen los nuesos barrios cada vegada en mayor númberu».
Con esta iniciativa pretenden dexar de llau «empreses que comercien col deporte, y al tiempu, cola salú de la población poniéndonos en riesgu de cayer n'adicciones qu'arruinen cuentes de bancu familiares y les nueses vides». Y piden el sofitu d'otros negocios pa siguir alantre cola actividá deportiva que caltuvieron cuasi un sieglu.
Dende'l club espliquen, amás, que nun llancen esta campaña en siendo contactaos por esti tipu d'empreses. Lo que quieren ye xenerar un futbol alternativu en que los socios seyan una parte fundamental de los equipos y non meros consumidores. Un deporte nel que'l negociu nun seya lo más importante.
Por too ello, dende'l conxuntu azulgrana soliciten el sofitu de pequeñes empreses que puedan sumar el respaldu necesariu pa competir un añu más y pasiar pelos campos d'Asturies el so fútbol y les sos reivindicaciones: «Por un deporte sanu y xustu. ¡Fuera'l negociu de la nuesa pasión!»
La campaña, tal que anunció'l mesmu equipu al traviés de les sos cuentes oficiales, ta teniendo una gran acoyida. Ello ye que fueron munchos los que quixeron felicitar al Rosal F. C. por lluchar dende'l so barriu escontra la incursión de les cases d'apuestes nel mundu del deporte y apostar por salir alantre con otru tipu de patrocinadores.
: