Esta edición va ponese en marcha esti sábadu con visites per nueve rutes culturales y naturales del Principáu a lo llargo de la seronda.
13 sep 2019 . Actualizado a las 05:00 h.La segunda edición del programa De itinerarios por el patrimonio dobla la so ufierta con percorríos por equipamientos industriales y rutes de naturaleza. Asina, van entamase visites a instalaciones mineres, a Muniel.los, al parque de Somiedu y a pueblos marineros. Esta edición va ponese en marcha esti sábadu con visites per nueve rutes culturales y naturales del Principáu a lo llargo de la seronda.
El programa busca dar más visibilidá y facilitar l'accesu de los visitantes al patrimoniu asturianu al traviés d'itinerarios diseñaos pa velos en media xornada o xornada completa, y qu'inclúin el serviciu de trensporte n'autobús con salida y llegada a Uviéu. La conseyera de Cultura, Política Llingüística y Turismu, Berta Piñán, que presentó esti xueves el programa en compañía del alcalde de Villaviciosa, Alejandro Vega, destacó «la calidá y l'interés» de los percorríos escoyíos, y l'ampliación de la ufierta, con cinco rutes nueves en comparanza cola primer edición.
La programación principia esta mesma selmana col percorríu pol Prerrománicu asturianu d'Uviéu y Valdediós, con paraes na ilesia de Santuyano, na Foncalada y nel conxuntu del monesteriu de Santa María de Valdediós y la ilesia prerrománica de San Salvador de Valdediós.
Una segunda ruta pol Prerrománicu asturianu, que trescurre per Uviéu y L.lena, va dexar visitar los monumentos uvieinos de Santa María del Naranco y San Miguel de Lliño, y la ilesia de Santa Cristina de L.lena.
Los otros dos Patrimonios de la Humanidá que tien Asturies tamién tán presentes nesta edición, con una ruta pel Camín de Santiagu al so pasu pel suroccidente y otra pel oriente asturianu.
Les principales novedaes del programa nesta edición céntrense nun percorríu pol patrimoniu industrial mineru, con visites al Muséu de la Minería (Mumi) y una ruta de senderismu industrial que va per La Pola Llaviana y llega a los pozos Carrio y Barreos.
Inclúi tamién na so ufierta d'anguaño visites a la Reserva Natural Integral de Muniel.los y al Parque Natural de Somiedu, amás d'una ruta per una ventena de pueblos de la mariña asturiana.
Les entraes pa participar en cinco de les rutes del programa tienen un preciu de 18 euros y amenorgáu de 15 euros pa públicu infantil de 4 a 11 años, grupos de más de 10 persones, visitantes con Pasaporte Cultural o con tarxeta del Club Cultura Principáu d'Asturies.
Pa los itinerarios pol Prerrománicu Asturianu, pol arte rupestre del Oriente y pol Patrimoniu Industrial el preciu xeneral ye de 15 euros y amenorgáu de 12 euros.