Barbón tien un marxe de cinco díes enantes les entrugues que-y va formular la oposición en sesión plenaria
AGORA
Los plenos nel parllamentu asturianu van pasar a celebrase los martes y los miércoles
17 sep 2019 . Actualizado a las 05:00 h.Les novedaes que se van aplicar pal funcionamientu de los plenos de la Xunta Xeneral pa esta llexislatura va afectar al tiempu que tien el presidente d'Asturies, Adrián Barbón, y el so equipu pa preparar les respuestes que-y formule la oposición nos plenos con «entrugues al Presidente». Los plenos nel parllamentu asturianu van pasar a celebrase los martes y los miércoles. Va ser precisamente na sesión de los miércoles cuando sían les entrugues de la oposición a Barbón.
Les normes nueves impulsaes polos portavoces de los grupos y recoyíos nuna resolución de la Presidencia de la Cámara, negocien que la oposición va tener hasta les 12.00 hores del vienres de la selmana anterior al plenu pa rexistrar les sos entrugues. Eso va permitir a Barbón tener un marxe que va dende esi vienres hasta'l miércoles siguiente pa preparar les respuestes a les cuestiones formulaes. Ye un tiempu sustancialmente mayor que'l que tenía'l so predecesor nel cargu, el tamién socialista Javier Fernández. Nes últimes llexislatures, Fernández contestaba a les entrugues nel plenu que se celebraba los vienres y los grupos teníen de plazu pa presentales el mediudía del miércoles d'esa mesma selmana, informa Europa Press.