Un llibru asturianu axunta pela primer vez los avances arqueolóxiques llograos n'aldees habitaes d'Europa

La obra, «The Archaeology of Medieval Villages Currently Inhabited in Europe» tuvo como editores a Jesús Fernández Fernández y Margarita Fernández Mier.

El llibru «The Archaeology of Medieval Villages Currently Inhabited in Europe»
El llibru «The Archaeology of Medieval Villages Currently Inhabited in Europe»

UVIÉU

El grupu d'investigación asturianu Llabor editó un llibru académicu que revisa l'arqueoloxía de les aldees medievales que permanecen habitaes en distintos países europeos. Anque hasta la fecha publicárense artículos de calter local, esta ye la primer vez que se realiza un esfuerciu de compilación a escala europea, con casos d'Asturies, Reinu Uníu, Francia, Holanda o los países escandinavos. No que se refier a la nuestra rexón, na publicación preséntense los exemplos de Vigaña Arcéu, en Belmonte, y Villanueva, en Santu Adrianu. La obra, The Archaeology of Medieval Villages Currently Inhabited in Europe, publicada por Archaeopress Publishing, de Oxford, tuvo como editores a Jesús Fernández Fernández y Margarita Fernández Mier.

La mayoría de les aldees d'orixe medieval ocupáronse de forma continua y permanecen habitaes agora, d'ehí la importancia d'estudiales pa llograr unes conclusiones afayadices sobre les redes d'asentamientos medievales n'Europa. Hasta agora, el focu principal de les intervenciones arqueolóxiques constituyéronlo les aldees abandonaes, poles facilidaes qu'ufierten, al caltenese y nun vivir naide nelles. La investigadora Margarita Fernández Mier esplica que «si conocemos la rede de poblamientu medieval namás nun porcentaxe mínimu (despoblados) ye mui difícil que podamos sopesar de forma creíble cómo yera esa rede». Por eso, añade, «necesitamos esta arqueoloxía de los asentamientos llabradores habitaos. Na midida na que exista una investigación sólida sobre los asentamientos que tuvieron una continuidá, la nuestra síntesis va tener desarrollo mayor que si namás se basa nesi porcentaxe pequeñu de despoblados qu'identifiquemos». Per otru llau, l'investigador Jesús Fernández señala que «precisamos saber por qué determinaos asentamientos medievales tuvieron continuidá, y esto namás ye posible sabelo nes aldees habitaes».

Comentarios

Un llibru asturianu axunta pela primer vez los avances arqueolóxiques llograos n'aldees habitaes d'Europa