Ún de Grao y D'Urria presenten los sos nuevos discos

Xixón acueye'l 22 de setiembre una nueva grabación del ciclu de conciertos en formatu íntimu, «Amosando»

Ún de Grao y D'Urria presenten los sos nuevos discos na segunda edición d'Amosando
Ún de Grao y D'Urria presenten los sos nuevos discos na segunda edición d'Amosando

UVIÉU

Xixón acueye'l 22 de setiembre una nueva grabación del ciclu de conciertos en formatu íntimu, Amosando. Los grupos participantes nesta ocasión van ser Ún de Grao y D'Urría, que van actuar nun conciertu que va grabase pa la so emisión per Internet. El ciclu ta entamáu por musicasturiana.com y nesta ocasión va acoyer la puesta n'escena de dos novedaes discográfiques. Per un llau, Ún de Grao presenta Pelo Segao, primer llarga duración d'esti veteranu artista de la escena folk onde reinterpreta pieces de tonada y d'otres músiques de raigañu asturianu pa llevales hacia soníos propios del rock, del jazz o de la bossa nova.

Dende Vil.lablino (Llión) van aportar D'Urria colos cantares que dan forma al so debú En Ca Pla. La música tradicional d'un llau y otru d'El Cordal siéntese nes composiciones d'esti cuartetu qu'usa nes sos lletres la variante dialectal del asturianu conocida como pal.luezu. Calidá y orixinalidá son axetivos que definen la personalidá de los dos grupos que protagonicen esta nueva edición d'Amosando, dambos amás nominaos nos Premios AMAS 2019 dientro de la categoría «Mejor Canción Folk». El conciertu/grabación va ser el 22 de setiembre a les 18.30 hores. La entrada ye de baldre y ta llendada a les 15 persones que ganen una invitación -con Cerveza Caleya y Asturcilla incluyida- participando nun sortéu al traviés de les redes sociales de musicasturiana.com. L'eventu ta entamáu pola tienda online y distribuidora dixital musicasturiana.com, realizáu por Javier Lueje, producíu por Goxe Producciones y patrocináu pola estaya de Turismu del Conceyu de Xixón y por Caja Rural de Asturias.

Comentarios

Ún de Grao y D'Urria presenten los sos nuevos discos