Esti traxe nun pasa de moda

F.S,

AGORA

Hasta 50 concursantes van competir n'Indumentaria 2019 en Grau

28 sep 2019 . Actualizado a las 05:00 h.

Un pocu de moda pero tamién un bon cachu d'hestoria. La Capiya de los Dolores en Grau acueye esti domingu una nueva cita de la yá consolidada amuesa del traxe tradicional asturianu. Pa ellos y pa elles, con pieces que traten d'ilustrar con veracidá les prendes de los nuesos antepasaos, lloñe d'estereotipos del folclore anticuáu.

La cita d'Indumentaria 2019 va axuntar nesta edición del concursu más traxes tradicionales asturianos que nunca, hasta 50 y van llegar participantes veníos de Tapia, Candás, Llanes, Piloña, Mieres, Llangréu, Xixón, Uviéu y Madrid pa desfilar, dende les 13.00 hores na Capiya de los Dolores «na única y más fermosa pasarela de moda del sieglu XIX». Amás va haber música en directo, con Octavio Trapiella y Dolfu Fernandez. Son, según la organización, «50 propuestes distintes y personales, que van enseñar la manera de vistir de los nuesos antepasaos destacando les característiques propies de los distintos llugares, situaciones vitales y posiciones sociales. Pañu fino y basta estameña, munchu negru y pardu resaltáu con colores vivos o apagaos, seda y terciopelu, ricos y probes, too va vese y va vistise en Grau na mañana del domingu».

El concursu Indumentaria 2019 tien tres distinciones en cada categoría (home y muyer); un primer premiu dotáu con 200 euros, un segundu de 150 euros y un terceru de 100 euros. Amás, los ganadores van recibir unes lligues, de diseñu esclusivu, que van poder llucir sobre les sos medies acreitando l'honor de ser los meyor vistíos de la edición de 2019.

El Día’l traxe’l país va cuntar amás con un escenariu instaláu na Plaza’l Mercáu, y que va dar espaciu al baille «con una panderetera de casa, Leticia de Baselgas, y va siguir colos toques y voces de dos vaqueires de raza, Rogelia y Clarina, que traen el folclore de les brañes de Valdés». La gaita y el tambor van enllenar la plaza colos sones del centru d'Asturies de la mano d'Iván y Fonsu Les Regueres. «Ellos van interpretar les imprescindibles xota, muñeira y saltón. De siguío, va ser la vez d'otra pareya de pandereteres, Laura y Guadalupe de Fitoria, a les que van dar el relevu los sones del oriente de la mano del tambor de Manolín el de Parres y la gaita de Santi Galguera. Cantar y sones a les panderetes interpretaos pol tríu Cantaruxare, compuestu por «Ambás», Ramsés y Paulino, van poner «el ramu» a un día únicu y llenu de color, identidá y allegría asturiana».

Naide escaez a los más pequeños y dende les 11.00 hasta les 12.00 delantre de la Casa Conceyu, va haber xuegos y un taller de baille tradicional impartíu pol Prau Llerón.