Berta Piñán dixo que yera «una situación que me resulta humillante como ciudadana» que nun-y dexaran falar n'asturianu na cámara
01 oct 2019 . Actualizado a las 12:52 h.La conseyera de Cultura, Política Llingüística y Turismu del Gobiernu asturianu, Berta Piñán, dixo esti martes que va a a trabayar nuna propuesta de modelu d'oficialidá de la llingua asturiana y del gallego-asturianu. Según dixo, la fórmula va caracterizase pola protección y la non imperatividá, que se construya «sobre l'alcuerdu y el consensu».
Piñán pronuncióse nestos términos na Xunta Xeneral, onde nun-y dexaron, en base al reglamentu de la Cámara, realizar la so intervención en llingua asturiana. Compareció acompañada del so equipu pa informar de los sos oxetivos de llexislatura.
La so propuesta d'oficialidá del asturianu, indicó, va ser «realista» y «d'alcuerdu cola situación sociollingüística asturiana y coles necesidaes culturales». Señaló que'l modelu va aplicase amás de «forma progresiva» y que va promover «actitúes positives hacia l'usu social d'una llingua que ye patrimoniu cultural d'Asturies» y que ye la «ferramienta de comunicación cotidiana» y de creación cultural pa «una parte significativa de la sociedá».
Piñán anunció la creación d'un Conseyu Asesor de Política Llingüística que se va poner en marcha nos meses próximos y que va ser representativu de la sociedá asturiana. Espera la conseyera completar esta llexislatura l'estudiu y revisión de la toponimia tradicional. Coles mesmes, aseguró que se van crear comisiones permanentes conxuntes cola conseyería d'Educación y la de Ciencia, Universidá y Innovación
Otra manera, la conseyería quier completar los procesos de normalización dixital y la implantación de traductores, buscadores y ferramientes qu'asitien l'asturianu nel universu de la rede. Nel mesmu capítulu, Piñán afirmó que se va trabayar pa llograr la especialidá docente pal asturianu.
«Una situación humillante»
Anque Berta Piñán acató nun principiu que la Xunta Xeneral nun-y dexara comparecer n'asturianu, quixo espresar el so enfadu polo que pasó na parte final de la so intervención inicial. «Ye una situación que me resulta humillante como ciudadana», señaló.
Añadió que la decisión de nun dexala intervenir n'asturianu sospriénde-y , sobremanera cuando la Xunta Xeneral sí dexa dende hai años a los diputaos facelo, como si ellos tuvieren una especie de «privilexu». Remanó esi asuntu énte los argumentos de los diputaos que protestaron énte la posibilidá de que falara n'asturianu porque nun la entendíen.
«Namás el fechu de qu'ustedes me faigan esto equí ye una prueba de que la llingua asturiana precisa una reconocencia llegal, pa que naide tenga que pasar per una situación asemeyada», dixo, según informó Europa Press.