Vergoña

AGORA

La portavoz de Ciudadanos en la Junta General del Principado de Asturias, Laura Pérez Macho
La portavoz de Ciudadanos en la Junta General del Principado de Asturias, Laura Pérez Macho

04 oct 2019 . Actualizado a las 08:49 h.

«La España que suma» resta, polo menos al respeutu a la cultura y a les distintes llingües del nuesu país. Paez que colos idiomes oficiales tien qu'amosar una falsa aceptación, pero aquelles que nun lo son na actualidá, como l'asturianu y l'aragonés, la derecha política torga'l so espardimientu, el so usu y el so fomentu ente la ciudadanía. Esta selmana vimos como na sede de la soberanía popular asturiana la conseyera de Cultura, la responsable política de la llingua, nun pudo espresase na llingua propia d'Asturies pola culpa del PP y de Vox. Ye increíble qu'esto asoceda y que eses dos formaciones polítiques nun sufran nenguna consecuencia electoral, lo que me lleva a pensar que'l camín a la oficialidá nun va ser tan unánime como prestaríame que fuera.

«Bienvenius a Uesca, ziudat billingüe. Charramos aragonés. Conzello de Uesca. Bienvenidos a Huesca, ciudad bilingüe. Hablamos castellano. Ayuntamiento de Huesca». Esti lletreru taba hasta'l martes en toles entraes de la capital oscense, ensin problemes, pero un alcuerdu plenariu del PP, Ciudadanos y Vox consiguió que pela mañana del miércoles fueren retiraos. Yá nun paez que sirva d'escusa que tea solamente un idioma. Nin con dos, unu d'ellos el castellán, sirve pa los intolerantes. Y nin tres, pa les personas que piten l’asturianu al entamar la ópera nel Campoamor.

¿De verdá cómo puede despreciase un idioma? ¿Nun se-y ve como una ferramienta cultural pa la comunicación de les persones? ¿El mal entendíu nacionalismu español nun quier a les otres llingües d'España? ¿De verdá hai un problema d'interpretación o ganes de llamar l'atención pa humildar a les y los falantes d'esa llingua? De verdá que nun lo entiendo. Atristáyame enforma como ciudadanu d'esti país esti escenariu nel que hai xente que quier imponer el so modelu de vida, el so únicu idioma y el so sinrazón a les demás. Nun pueo definilo d'otra manera: vergoña.