Bertu Ordieles pon en marcha un crowdfunding p'asoleyar el so llibru «Llugares máxicos d'Asturies»
05 oct 2019 . Actualizado a las 05:00 h.Un llibru distintu sobro mitoloxía asturiana. Asina podría resumise Llugares máxicos d'Asturies, l'últimu trabayu de Bertu Ordiales, nel que l'autor escueye 60 puntos de la xeografía asturiana «onde la maxa del so pasáu sobrevive nel presente». Ordiales tien en marcha un crowdfunding pa consiguir el dineru necesario pa imprentar la publicación.
Ordiles especifica que tolos rincones qu'inclúi'l llibru «cumplen la esencia de tar venceyaos con dalguna lleenda». Amás, la publicación inclúi dos tipos de llugares: «los que fueron realizaos pol home, como pue ser formaciones megalítiques; y otres heredaes de la naturaleza, como les sableres». Toles semeyes fueron realizaes por él, lo mesmo que los testos que les acompañen. «Son testos bien axilosos y precisos», esplica. El llibru ta formáu por sesenta llugares del territoriu ástur arrexuntaos en siete capítulos. Cada llugar va acompañáu de, pelo menos, dos semeyes en gran tamañu y un testu descriptivu n'asturianu y castellán.
Pa poder editar el llibru, l'autor precisa 4.800 euros. Por ello punxo en marcha un crowdfunding pa recaldar dineru. Yá cubrió'l 40% d'esa cantidá y el sistema va tar abiertu hasta'l 5 de payares. Hasta'l momentu, les persones rexistraes namái se comprometieron a collaborar y nun va ser hasta que se complete la cifra total cuando se-yos descuente'l dineru. Si nun s'edita'l llibru, nun se va cobrar a naide.
N'agradecimientu a l'aportación de los mecenes, l'autor ufierta trés recompenses según la opción escoyida: mención nel llibru como mecenes; adquisición d'una taza o alfombrina de mur esclusivos personalizaos. Nellosva amosase la portada del llibru amás de la frase «Yo fui mecenes» y el nome de la persona que se quiera.
Bertu Ordieles ye llicenciáu en bioloxía pero yá tien esperiencia nel mundu de la escritura. Ye autor d'una guía d'árboles asturianos y d'otra de senderismu. Amás, escribe artículos en medios de comunicación, ente ellos LA VOZ DE ASTURIAS, y ye miembru de Sabencia, la Sociedá Asturiana de les Ciencies.