Delles organizaciones impulsen una actividá de concienciación nes pistes de Valgrande, en Payares
14 oct 2019 . Actualizado a las 17:53 h.El faisán montés ta en peligru d'estinción y cualquier acción dirixida al so caltenimientu tien importancia. Pa recuperar el so hábitat y facilitar la so superviviencia, delles organizaciones impulsaron una actividá de concienciación nes pistes de Valgrande, en Payares. Les sos principales acciones fueron la retirada de basoria y la plantación de pinos.
La xornada de concienciación consistió na retirada de basoria de la redolada y na plantación de 50 pinos monteses que, según Fapas, va ayudar a recuperar l'espaciu natural nel que s'atopen les pistes de Valgrande y van favorecer «la recuperación del hábitat de munches especies de fauna salvaxe».
Dende la organización ecoloxista sostienen que «ye importante usar los sistemes de protección tipu cactus, yá que pretenden evitase los daños que puedan facer los xabalinos y les vaques que pastien nestos puertos de monte». Amás, Fapas considera qu'esti tipu d'actividaes de concienciación «son de vital importancia yá qu'ayuda a grandes y pequeños a entender el mediu nel que viven y caltener los espacios naturales que los arrodien».
Per quintu añu consecutivu Fapas collaboró colos clubes Ski Club Elit Mirios, Club Cuitu Negru, Pajares Ski Club, Club Alpino Peñaubina, Club Camposki, Club La Picarota, Club Only Locals y Club We snow de la estación de Ski de Payares na que participaron los neños y padres d'estes entidaes, según dellos esquiadores de la estación.