Llanes, la más guapa d'Instagram

F.S.

AGORA

La villa del oriente d'Asturies tien la primer posición en menciones de la rede social como pueblu con encantu

29 oct 2019 . Actualizado a las 12:44 h.

Hai munchos concursos y alderiques sobre la guapura de los pueblos con encantu a lo llargo de tola xeografía de la península, cuasi siempre con dalgún asturianu destacáu. Y anque ye una cuestión que depende, y muncho, del gustu personal de caún, y dacuando hasta de la potencia de la vecindá pa votar en masa n'internet, tamién hai criterios que busquen el rigor d'un númberu.

Tirando de les menciones de semeyes publicaes n'Instagram, Llanes fíxose cola primer posición indiscutible de la llista ellaborada pol buscador Holidu nel so «Los 10 pueblos españoles con encanto que conquistan Instagram»; y el pueblu del oriente d'Asturies lidera con 214.842 menciones.

Na so descripción, pa definir al ganador, destaquen de Llanes que «esti pintorescu pueblín del norte estiéndese a orielles del Cantábricu, onde despliega los sos encantos como un magníficu patrimoniu cultural, playes perguapes ya impresionantes paisaxes montascosos y enllenos de verdor. Nun te pierdas el so centru históricu d'estilu medieval, el Torrexón y les muralles del sieglu XIII, la Basílica de Santa María y el Palaciu de Castañaga».

La so primer posición acompañase de seis semeyes espectaculares de la villa y el so paisaxe.

Los otros pueblos con encantu d'Instagram de norte a sur, son Sóller, al noroeste de Mallorca; Mogán, en Gran Canaria; Sarria en Lugo; Astorga, na provincia de Lleón, Palafrugell en Girona; Santoña, en Cantabria; Vejer de la Frontera en Cádiz; Baeza, na provincia de Xaén y, a lo último, Cambados en Pontevedra.  

Los organizadores destacaron que pa facer la llista tuviéronse en cuenta 363 pueblos españoles d'ente 10.000 y 30.000 habitantes y que los sos nomes nun signifiquen na o que nun seyan homónimos n'otros países. La clasificación fíxose según el númberu de hashtags n'Instagram.