«Seltegu», un Felpeyu pasáu pel Líbanu

La obra del dibuxante Ruma Barbero foi la ganadora de la decimoprimer edición del Premiu Alfonso Iglesias de Cómic en llingua asturiana


«Seltegu» ye una confusión y tamién la hestoria de la xente d’un país que s'asoma dacuando a una tregua na vida, nuna guerra que paez que nun acaba nunca.

La obra Seltegu, del dibuxante Ruma Barbero foi la ganadora de la decimoprimer edición del Premiu Alfonso Iglesias de Cómic en llingua asturiana. El premiu, convocáu y concedíu pola Conseyería de Cultura, Política Llingüística y Turismu del Gobiernu d’Asturies, tien una dotación de 5.000 euros.

Barbero definióla como «una crónica d'una selmana que tuvimos de xira’l grupu Feleyu pel Líbanu nel añu 2005». Tamién ye un títulu que dio un error.

«Seltegu ye'l cartelu que tenía'l taxista que nos mandó la embaxada española y escribió mal Felpeyu, porque nun taría d’escribir nel alfabetu occidental». Neses páxines Barbero anda per un país convulsu a cuatro meses de que morriera'l presidente nun atentáu y «de que marchara l’exércitu d’ocupación siriu»

El dibuxante dixo que «ye un poco lo perdíu que te ves nun ambiente asina y lo prestosa que foi la esperiencia cola xente»

Rumaldo Antón Barbero de Diego, Ruma Barbero, nun ye nuevu nesto. El curriculum de la nota qu'anuncia'l premiu diz que ye llicenciáu en Belles Artes y como autor de cómic tien ganao yá dos veces el premiu «Alfonso Iglesias», poles obres Manzajú (2009) y El viaxe a la lluz (2015). Amás d’estos dos títulos, les sos últimes publicaciones nesta estaya n’asturianu son Aguantando cachones 2 (2016), Gaspar a tiempu completu (2019) y Les 7 maraviyes de Xixón (2019). Aparte de la so faceta como autor de cómic, ye tamién diseñador y maquetador de llibros y discos, amás de miembru del grupu folk Felpeyu y lletrista pa munches formaciones asturianes.

En «Seltegu» «cuento la historia llinialmente, más que saltos temporales lo que voi faciendo son anotaciones pa cuntar coses sobre'l país, sobre'l conflictu. Si vamos en tiempu real pasando delantre d'un campamentu de palestinos sálgome un par de páxines y esplico por qué tán los palestinos nel Líbanu; o por exemplu nel barriu armeniu de Beirut paro en ver cómo ye qu'acabaron armenios ellí».

Ente les obres presentaes, el xuráu decidió conceder el premiu al cómic tituláu Seltegu, destacando, como consta n’acta, que se trata de «una obra autobiográfica mui plástica y bien compuesta que domina los recursos narrativos del xéneru».

Comentarios

«Seltegu», un Felpeyu pasáu pel Líbanu