Pablo Texón, poeta y académicu de l'ALLA diz que la bronca na Xunta col asturianu espeyó'l conflictu llingüísticu qu'existe n'Asturies
11 nov 2019 . Actualizado a las 05:00 h.Tovía en mayo Pablo Texón publicó «Allumamientu», col que se fixo col XXIV Premiu Xuan María Acebal de Poesía. Académicu de la ALLA quier que l'academia «seya sentida como cercana al pueblu» y una oficialidá que sirva «pa dar derechos a quien agora nun los tien y nun quita nengún derechu a naide».
-¿Cómo te namorasti del asturianu? ¿Foi un testu, un poema, lo qu'oyisti en casa...?
-Creo que nunca me namoré del asturianu. Eso ye una concepción (involuntariamente) diglósica qu'atribúi a la llingua minorizada un componente emocional que tapez la so validez comunicativa. Sí ye verdá que cuando sistematices científicamente una realidá tan alloñada de los focos de poder como ye la llingua asturiana sientes una emoción redentora mui prestosa. Sí, pue ser daqué asemeyao a namorase...
-La escuela, pero tamién la música, ficieron muncho pol asturianu nestes décades ¿quién te paez que fizo más?
-Quien más fixo pol asturianu foron los falantes que siguieron espresándose nun idioma que nun yera más qu'una torga na so carrera social. Digan lo que digan, l'asturianu nun nos da privilexos, sinón problemes esternos pa desarrollanos.
-¿Tienes autores n’asturianu favoritos, unes referencies?
-Sí, munchos. Y ayudáronme a intentar ser universal dende'l sitiu onde nací.
-¿Qué sentisti al entrar na ALLA?
-Entré de becariu na Academia a los 23 años y llevo más de 15 poniendo escuela na so Universidá de Branu, polo que'l nomamientu como académicu foi un reblagu mui prestosu nel mio andar pela vida. Nun foi daqué anecdótico, sinón daqué relevante y, nesi sen, natural.
-¿Qué quies facer na Academia?
-Que se sienta y seya sentida como cercana al pueblu qu'hai tres d'ella.
-La llexislatura na Xunta arrancó con bronca por nun dexar falar n’asturianu a Berta Piñán, ¿qué te paez?
-Hai xente que nun tien munchu vezu a la hora d'usar la democracia y anden torpes no que tien que ver cola llibertá. El problema ye qu'arrastren pa la so vera a munches otres persones.
-Va años que se fala n'asturianu na Xunta ensin problema, ¿qué pasa agora?
-Eso d'«ensin problema» ye mui relativo. Too esto tien una parte positiva: espeyóse y visibilizóse'l conflictu llingüísticu qu'existe n'Asturies y viose cómo la oficialidá ye necesaria dafechu pa garantizar los derechos llingüísticos de les asturianes y asturianos.
-Dime algo que vieras de xente mui mozo facer n’asturiano que te emocionara.
-Nada en particular. Día a día los escucho falar n'asturianu nel mio centru de trabayu; la llingua asturiana forma parte d'ellos, natural, harmónica y vivencialmente.
-Siempre se diz que podría facese una oficialidá «a la asturiana» ¿cómo crees tu que sería?
-Lo que yo crea nesi sentíu nun creo que tenga munchu valir o importancia, pero supongo que tenía qu'adaptase a les peculiaridaes sociales, históriques y económiques d'Asturies. Sobra dicir qu'esa oficialidá sirve pa dar derechos a quien agora nun los tien y nun quita nengún derechu a naide.