El futbolista de Tiuya retírase tres una carrera enllena d'ésitos
14 nov 2019 . Actualizado a las 09:41 h.David Villa punxo en marcha la cuenta atrás de la so carrera deportiva. El futbolista asturianu anunció dende Xapón la so retirada n'avientu del fútbol profesional, cuando acabe la Copa del Emperador, el so últimu oxetivu. L'anunciu causó una gran conmoción nel fútbol mundial, que reconoció la gran figura y carrera d'un deportista nacíu en Tiuya y que dexó una brillante buelga.
Lloñe queden los sos entamos nel Llangréu y una anécdota que marcó la so vida. A los cuatro años, Villa taba xugando al fútbol cuando otru neñu cayó sobre él y causó-y una rotura de fémur na so pierna derecha. Una llesión grave. Dellos médicos agoraron que la rotura provocaría que David se quedara con una pierna más curtia que la otra. Había dos opciones: una ciruxía con riesgu de quedar coxu o enyesar la pierna al altor del cadril mientres meses. El padre de Villa, José Manuel, optó pola segunda opción y David entá recuerda cómo se pasaba hores dando pataes y pataes cola pierna izquierda. El restu de la hestoria yá la conocemos: Villa siempres se caracterizó por emplegar bien dambes piernes, una virtú que se xestó nel patiu de so casa de Tiuya, cola paciencia de so padre.
"El Guaje", l'apellativu que lu llevó a la fama internacional, tien los sos oríxenes nuna familia humilde de les Cuenques. So padre yera mineru y Villa entá recuerda con dolor dalgún murniu accidente del que consiguió salir indemne. El Sporting fixóse nél y a los 16 años fichólu pal so equipu xuvenil. David estudiaba un módulu de FP porque-y gustaba ser lletricista pero muncho más ser futbolista. Entós diose un ultimátum de dos años de prueba: si nesi tiempu nun llegaba al equipu profesional arrenunciaría al fútbol y tornaría a la FP. Dicho y fecho. Dos años dempués, los sos padres fueron dos de los 16.000 aficionaos qu'asistieron al debú profesional de Villa. El Molinón, el campu máxicu onde El Bruxu Quini, l'ídolu de José Manuel Villa, sentó cátedra. En dos campañes xugó 79 partíos y marcó 38 goles. Asturies perdió a un lletricista pero ganó a un ídolu deportivu.
Mientres la siguiente década, la hestoria de Villa ye la d'un ascensu y un saltu permanente. Zaragoza, Valencia, Barcelona, Atlético de Madrid. En 2005, llegó unu de los momentos cume de la carrera de David Villa: el debú cola selección española n'Almería escontra San Marín. El so primer gol, de los 59 que marcaría en 98 partíos, foi nun partíu contra Eslovaquia. El balance cola selección ye espectacular: el máximu goliador, una Eurocopa y un Mundial como figura clave de la meyor xeneración del fútbol español. La copa en Sudáfrica sedría imposible ensin él gracies a la so velocidá y la so capacidá de desmarque.
Pero hubo munchos más títulos. Dos Lligues, trés copes del Rei, Trés Supercopes, una Lliga de Campeones, una Supercopa d'Europa y un Mundial de Clubes. Un historial memorable. Dempués empecipió la última etapa de la so carrera deportiva n'Australia, n'Estaos Xuníos otres cuatro temporaes y a lo último en Xapón col so amigu Andrés Iniesta, nel Vissel Kobe. Mientres la dómina dorada de la so carrera llogró ser máximu goliador nacional de la Lliga tres vegaes (2006, 2007 y 2010), amás de «Pichichi» de la Eurocopa de 2008 y Bota de Plata del Mundial de 2010.
Namoráu de Nueva York, Villa decidió agora sumase a la creación d'un nuevu equipu nel distritu neoyorquín de Queens, el Queensboro FC, qu'en 2021 va empezar a competir na USL estauxunidense (una categoría profesional per debaxo de la MSL). «Queens siempres amosó muncho amor hacia min y la mio familia cuando tuvimos en Nueva York. Pa min ye un suañu construyir un equipu profesional ellí», dixo. Entama una etapa nueva.