Retratos baxo les foles

F.S.

AGORA

L'Acuariu de Xixón recueye una amuesa de fotografíes somarines d'Emilio Fernández

22 nov 2019 . Actualizado a las 05:00 h.

Una grave infección cuasi acabó cola vida d'Emilio Fernández en 2011 cuando, mientres practicaba la so afición al bucéu en Tailandia foi afectáu por una «streptococcus», la conocida como bacteria «come carne», anque llogró salir alantre y poder siguir calzándose les aletes y poniéndose les sos gafes de bucéu pa retratar el paisaxe y fauna baxo les foles.

Una amuesa de les sos fotografíes recuéyese agora nel Acuariu de Xixón, disponible pa tolos visitantes del centru y que, según el director del acuariu, Alejandro Beneit, «supón un gran sofitu nel nuesu oxetivu d'espublizar la guapura y diversidá de los océanos»

A pesar de los pesares, Emilio Fernández guarda una bona alcordanza de Tailandia. Foi ellí cuando empezó a namorase de la fotografía somarina. Yá siendo un neñu empezó a sentir esta afición y cuenta que-y gustaba montar y desmontar cámares y oxetivos p'añader funciones extra como la multiesposición o amenorgar les distancies d'enfoque. Pero la combinación col bucéu llegó nesti viaxe a Tailandia cuando fixo somarinismu per primer vegada.

Dende entós Emilio nun dexó de fotografiar los fondos marinos. Los sos viaxes lleváronlu a Filipines, Malasia, el Mar Coloráu, Maldives, Zanzíbar, El Hierro o Tenerife. L'amuesa nel Acuariu de Xixón inclúi munches de les criatures marines qu'Emilio atopó nos mares nos que bució.

L'oxetivu d'esta esposición pretende poner valor el mediu marín. Apóyase na misión del Acuariu de Xixón d'emocionar pa concenciar sobro la importancia de caltener la riqueza de los mares.