Uvieu recorta pol asturianu los presupuestos

PP y Ciudadanos quiten la subvención prevista pa l'Academia de la Llingua y la plaza del Coordinador en Llingua Asturiana prevista na Ufierta Pública d'Empléu


La Xunta pola Defensa de la Llingua Asturiana (XDLA) acusó al Conceyu d'Uviéu --PP y Ciudadanos-- de «despreciar» la llingua asturiana y «zarrar los güeyos» a les «potenciales» que, al so xuiciu, tien el patrimoniu llingüísticu tien pa xenerar empleú y turismu.

Al traviés de nota de prensa, la organización posicionóse sobre la decisión de PP y Ciudadanos de quitar la subvención prevista pa l'Academia de la Llingua y amortizar tamién la plaza del Coordinador en Llingua Asturiana prevista na Ufierta Pública d'Empléu.

Asina, el proyectu de presupuestos pal exerciciu de 2020 de la Fundación Municipal de Cultura, aprobáu nel Conseyu Rector, algama los 11.714.500 euros, nos que la partida dedicada al usu y promoción de la llingua asturiana ye cero. Una situación que pa la XDLA demuestra la política llingüística de la derecha: «la del despreciu más absolutu, la de nun gastar un euru nello».

«La derecha provinciana d'Asturies presenta toa enchipada los sos presupuestos de Cultura inorando dafechu l'asturianu, anque pa los poderes públicos haya una obligación por llei de velar por esi patrimoniu cultural», recuerda la organización, que pon d'exemplu a Galicia pa señalar qu'ellí sería imposible que PP y Ciudadanos se punxeren d'alcuerdu pa eliminar cualquier tipu d'ayuda al gallegu na capital de Galicia.

«Eso n'Asturies ye posible porque la incultura y l'autoodiu de la derecha local fai posible eso y muncho más», diz la organización, qu'esto supón que nun se destinen recursos «pa la única realidá cultural propia y diferencial d'Asturies».

Otra manera, destacaron les «potencialidaes» que tien la normalización de la llingua asturiana pa xenerar puestos de trabayu, «pa facer posible una marca de diferenciación turística», y esperen que nel futuru exista «una derecha que nun desprecie l'asturianu» y que defenda los sos postulaos políticos «ensin arrenegar de la llingua del país». «De momentu, nun la tenemos y n'Uviéu ta la prueba», sentencien.

Comentarios

Uvieu recorta pol asturianu los presupuestos