El Principáu garantiza recursos nos presupuestos pa la Sienda del Osu

Calvo esplicó qu'amás de los arreglos d'urxencia hai que buscar una solución «estable nel tiempu» pa la infraestructura

Senda del Oso
Senda del Oso

El conseyeru de Desarrollu Rural, Agroganadería y Pesca del Gobiernu asturianu, el socialista Alejandro Calvo, treslladó esti martes la intención del Executivu rexonal d'incluyir nel proyectu de presupuestos rexonales de 2020 les partíes necesaries pa reparar los defectos que presenta la Sienda del Osu.

Depués d'una pregunta del diputáu d'IX Ovidio Zapico nel parllamentu asturianu sobre esti asuntu, Calvo esplicó qu'amás d'esos arreglos d'urxencia hai que buscar una solución «estable nel tiempu» pa la infraestructura.

Recordó Calvo que la Sienda del Osu yera responsabilidá de la mancomunidá formada polos conceyos de Santu Adrianu, Proaza, Teberga y Quirós, qu'agora ta en disolución. Por eso, esplicó que'l Gobiernu asturianu aconceyó colos conceyos pa buscar esa solución pal caltenimientu de la sienda, informa Europa Press.

La creación d'un consorciu públicu ye una cuestión que se planteó, pero Calvo alvirtió que llevaríen el so tiempu los trámites alministrativos y nun xeneró consensu ente los responsables municipales. Otra posibilidá qu'existe y que nun refugó ye la ufierta de la Fundación Oso p'asumir la xestión de la sienda. «Lo que tenemos que facer ye buscar la meyor solución», señaló.

Comentarios

El Principáu garantiza recursos nos presupuestos pa la Sienda del Osu