Cuasi 500 persones presentáronse a les primeres pruebes oficiales d'aragonés

La Voz

AGORA

Llograron la calificación d'aptu un 71,94 por cientu de los presentaos na Escuela Oficial d'Idiomes de Zaragoza

06 feb 2020 . Actualizado a las 13:00 h.

Cuasi 500 persones presentáronse en 2019 a les primeres pruebes de nivel de llingua aragonesa que se celebraron na Escuela Oficial d'Idiomes de Zaragoza. Yera pa los niveles B2, B1 y A2, que son los establecíos pal aragonés d'alcuerdu col Marcu Européu de Referencia para les llingües.

La participación nes pruebes sumó un total de 473 inscritos de los trés niveles. Llograron la calificación d'aptu un 71,94 por cientu de los presentaos a B2, un 49,09 por cientu en B1 y un 79,07 por cientu n'A2. D'esta manera 161 persones algamaron, pela primer vez, una titulación oficial en llingua aragonesa.

Precisamente, esti 5 de febreru del 2020, el Boletín Oficial del Principáu d'Asturies publicó la resolución de la Conseyería d'Educación pa la convocatoria de la prueba del nivel Intermediu B2 de llingua asturiana. Asina, l'asturianu dexa de ser la única llingua del Estáu ensin pruebes oficiales pa certificar de forma oficial el nivel competencial nel so usu.

Na primer convocatoria --que se van celebrar a finales de mayu n'Uviéu-- van poder concurrir un máximu de 500 aspirantes. El plazu d'inscripción pa los interesaos ábrese'l 6 de xineru y acaba'l 14 de febreru. Estes pruebes van convocase polo menos una vez al añu pa un mínimu d'ún de los niveles (A1, A2, B1, B2, C1 nel casu del asturianu); informó Europa Press.